Congress-in Michel-a lawyer hnawtchhuak

Congress party chuan AgustaWestland deal siamnaa official-te thamna petu bera puh, Christian Michel-a lawyer advocate Aljo K Joseph chu an party aṭangin a hnawtchhuak a, Youth Congress legal department national in-charge a nihna pawh hlihsak nghal a ni. 

Christian Michel hi AgustaWestland deal siamna kawnga a inrawlh danah a chungthu ngaihtuah turin Dubai aṭangin India ramah rawn thawn a ni a, Nilaini khan Delhi court-ah a inlan. 

Indian Youth Congress (IYC) thupuangtu Amrish Ranjan Pandy chuan Michel-a thubuaia a dinsak chungchangah Aljo K Joseph hian Youth Congress a rawn lo a, IYC chuan a thiltih dan hi a thlawp lo bawk niin a sawi. Hei vang hian IYC legal department aṭangin a ban a, party aṭangin hnawtchhuah a ni, a ti.

Advocate Joseph pawh hian Michel-a thubuai a lak chungchangah Congress party mi a nihna nen inzawmna engmah a neih loh thu a sawi a, Congress party mi a nihna leh a hna lawyer a nihna chu thil hrang hlak a ni, tiin a sawi. 



Share this Post

Login to comment
No Comments