Ram temple sakna tur dan siam a ni lo ang : Ram Vilas Paswan

Union Minister leh Lok Jan Shakti party president Ram Vilas Paswan chuan Hindu pawl hrang hrangten Ayodhya-a Ram temple sak a nih theihna tura dan siam tura sorkar an nawr chungchangah, ram danpuiin Ram temple sakna tura dan siam hi a remti lo tih a sawi.  Hemi chungchangah hian Supreme Court thutlukna siam chu thutawp a ni a, hei hi mitinin an pawm thiam a ngai a ni, a ti. 

Supreme Court chuan Ayodhya-a Hindu leh Muslim te ram inchuh thubuai chu nakkuma ngaihtuah turin a dah a, mahse court thutlukna tihchhuah a nih hnuah pawh Hindu puithiam leh pawl hrang hrangte chuan Ayodhya-a Ram temple sak ṭan thuai hi phutin, temple sak a nih theihna tura dan siam turin sorkar laipui pawh an phut nasa hle a ni. 

Paswan chuan sorkar chu Hindu emaw Muslim emaw ta bil a ni lo a, prime minister pawh NDA emaw UPA emaw bil ta a ni thei lo tih a sawi. PM atana thlan a nih aṭang khan Parliament chu a temple, Constitution chu a sakhua a ni a, Constitution hian sakhaw bil tana hetiang dan siam hi a remti lo a ni, a ti. 



Share this Post

Login to comment
No Comments