India leh UAE-in inremna pahnih ziak

India leh UAE chuan Thawhlehni khan Abu Dhabi-ah thawhdunna tura inremna pahnih an ziak a, pakhat chu currency swap deal a ni. 

Thawhṭanni khan External Affairs minister Sushma Swaraj-i chu ni hnih cham turin UAE-ah hian a zin a, UAE foreign minister Abdullah bin Zayed Nahyan nen inkawmin security, defence, counter-terrorism, trade leh energy lamah ram pahnihten thawhdunna zau leh ṭha zawk an neih theih dan turte an sawidun. Hruaitu pahnih hian thawhdunna tura inremna thuthlung pahnih hi an ziak nghal a, hengte hi Agreement of Currency Swap leh MoU for Development Cooperation in Africa a ni. 

Currency Swap hi ram pahnihten anmahni pawisa hmanga insumdawnna an kalpuina tura inremna an siam ṭhin a ni a, import leh export chungchangah  exchange rate hmanga payment an inpek theihna tur a ni. 

Ram pahnihte insumdawn tawnna hi dollar tluklehdingawn 50 hu dawn a tling a, sumdawnna lama an thawhpui lian ber zinga mi ve ve ni tawnin, investment pawh an tipung nasa hle. UAE hi India-in oil a lakuhna ram lian parukna niin, India mi maktaduai 3.3 vel an awm mek bawk.

Thawhlehni khan Sushma Swaraj-i leh Abdullah bin Zayed Nahyan te chuan Abu Dhabi-ah Mahatma Gandhi leh modern UEA dintu Shaik Zayed te chanchin, hnathawh leh an thuthlungte pholanna, Gandhi-Zayed Digital Museum chu an hawng dun bawk. He digital museum hi Gandhi piancham vawi 150 lawmna leh Shaik Zayed piancham vawi 100 lawmna puala siam a ni. 



Share this Post

Login to comment
No Comments