AgustaWestland case : Delhi Court-ah middleman Christian Michel inlan

Helicopter siamtu, AgustaWestland hnen aṭanga VVIP hman tur helicopter leina tura inremna siam chungchanga thil dik tawk lo awm nia sawi chhuina kal zelah, inremna siamna kawnga palai hna thawktua puh Christian Michel chu Dubai aṭangin India ramah rawn thawn a ni a, nimin khan Delhi court-ah hruai a ni. 

Kum 2010 khan sorkar laipui chuan President, PM leh VVIP dangte hman turin AgustaWestland AW101 helicopter 12 leina turin contract cheng vaibelchhe 3,600 hu a ziahpui a ni. Mahse contract ziah a nih hnuah hian AgustaWesland-in contract a hmuh theihna tur hian politician leh sipai official eng emaw zat chuan company aṭang hian thamna sum an dawng nia sawi a ni a, hei vang hian chhui zui a ni ta a ni. 

Contract tihfel a nih theihna tura palai hna thawktu nia sawi, Christian Michel hian AgustaWestland  hnena aṭang hian cheng vaiblechhe 225 dawngin, hei hi company-in cheng vaibelchhe 3,600 man contract a hmuh theihnan hian politician leh bureaucrat-te thamna atana hmang nia puh a ni. Mahse inremna siam a nih theihna atana official-te thamna sum pea puh an nih avangin kum 2014 khan Italy court chuan AgustaWestland parent company, Finmeccanica chairman Giuseppa Orsi leh AgustaWestland CEO Bruno Spagnolini te chu a man a, hemi hnu hian he inremna siam pawh hi tihtawp a ni zui a ni. 

Sorkar chuan  AgustaWestland hnena sum a lo pek tawh chu a hmu let deuh vek tawh a, mahse inremna siam a nih chungchanga thil dik tawk lo awmte chu chhuiin, he thilah hian hetih hunlaia Prime Minsiter Mannmohan Singh, defence minister hlui AK Antony, UPA chairperson Sonia Gandhi, MP Ahmed Patel leh IAF hotu hlui SP Tyagi-te inhnamhnawih leh inhnamhnawih loh chungchang pawh chhuizui a ni bawk. 

Contract ziahfel a nih theihna tura palai hna thawktu leh thamna sum petu ber puh, Christian Michel hi Interpol in a laka hriattirna a tihchhuah hnuah nikum khan UAE-ah man a ni a, mahse bail-a chhuah leh nghal a ni. Sorkar laipui chuan Michel hi a chungthu ngaihtuah a nih theih nan India rama thawn turin Dubai sorkar a ngen a,  Thawhlehni zan khan Delhi rawn thlenpui a ni a, CBI headquarters-ah hruaiin thu zawhfiah nghal a ni. 



Share this Post

Login to comment
No Comments