India satellite lian ber GSAT-11 kahchhuah a ni

India in satellite a siam tawh zinga lian, rit leh chak ber, GSAT-11 chu nimin zing khan French Guiana aṭangin hlawhtling taka kahchhuah a ni. 

Indian Space Research Organisation (ISRO) Chairman K Sivan chuan GSAT-11 hi Arianespace rocket, Ariane-5 hmangin South America hmarchhak lam tuipui kama France territory, Kourou-a Ariane Launch Complex aṭangin India sanaa zing dar 2.07-ah kahchhuah a nih thu a sawi. GSAT-11 kahchhuah lai hi Doordarshan chuan live in a pechhuak a ni. 

Sivan chuan GSAT-11 chu India tana space asset hlu ber a ni tih sawiin, he satellite-ah hian spot beam 38 bakah sub beam pariat a awm a, hei hian India ram pum, hmun kilkhawr zawkte pawh a tuam chhuak thei dawn niin a sawi. He satellite hian 16 GBPS data link service a pe thei dawn tih a sawi bawk. 

GSAT-11 hi sorkar laipuiin Digital India Mission hnuaiah ramchunga high data connectivity, 100 GBPS pekna tura satellite pali a duan zingah a pathumna a ni. Kg 5,854 a rit nin ISRO in satellite a siam tawh zingah rit ber a ni. 

Kumin May 25 khan GSAT-11 hi kahchhuah tura ruahman a ni a, mahse ISRO lamin a khawl lam ennawn leh a ngai tih an sawi vangin kahchhuah hun hi sawn hlat a ni ta a ni. Space agency in a tarlan danin, GSAT-11 hian ram pumah high data connectivity a pe thei dawn a, hei bakah hian Bharathnet project hnuaiah gram panchayat-te tan broadband connectivity pein, enterprise network leh broadband-ah high date rate application peknaah a pui thei dawn bawk a ni. 

Ariane-5 vehicle hian GSAT-11 bakah Korea Aerospace Research Institute (KARI) tan GEO-KOMPSAT-2A a phur tel bawk.



Share this Post

Login to comment
No Comments