Gujarat sorkarin Ahmedabad khaw hming thlak tum

Gujarat deputy chief minister Nitin Patel chuan an state-a BJP sorkar chuan Ahmedabad khawpui hming chu Karnavati tia thlak an duh thu a sawi a, hming thlak tura dan lamah harsatna a awm loh a, mipui lamin an thlawp chuan a hming hi thlak an tum tih a sawi.

Nitin Patel chuan chanchinthar lakhawmtute a kawmnaah, India ram khawpui zinga 'World Heritage' tag neitu awmchhun, Ahmedabad chu Karnavati tia thlak chu mi tam takin an duh niin a sawi a, harsatna a awm loh chuan sorkar pawh he khawpui hming thlak tur hian a inpeih reng a ni, a ti. 

Ahmedabad chhehvelah hian kum zabi 11 aṭangin mi an cheng tawh a, hetih hunlai hian Ashaval tia hriat a ni. Chaulukya lal Kana of Anhilwara chuan Ashaval-a Bhil lal chu doin a hneh a, Sabarmati lui kamah Karnavati khawpui hi a din a ni. Kum AD 1411-ah khan Sultan Ahmed Shah chuan Karnavati bulah hian khawpui thar dinna tur lungphum phumin, a chhehvela mithianghlim palite hming chawiin Ahmedabad tiin a vuah a ni. 

Patel chuan hun remchangah khawpui hming thlak chungchang chu an ngaihtuah dawn tih a sawi. 

Hetihlai hian Gujarat state unit Congress thupuangtu Manish Doshi chuan khawpui hming thlak tumna chu sawiselin, hei hi rorellai party BJP-in vote an zawnna hmanrua mai niin a sawi. Doshi chuan, "BJP chuan Ayodhya-a Ram temple sak leh Ahmedabad khawpui hming Karnavati thlak chungchangte chu Hindu vote hmuhna atan an hmang a ni", a ti. Thuneihna an chan hnuah BJP chuan hetiang thil hi an buaipui fo a, Hindu te chu an bum a ni, a ti. 

Thawhlehni khan Uttar Pradesh Chief Minister Yogi Adityanath-a chuan an state-a Faizabad chu Aodhya tia thlak a nih thu alo puang tawh bawk a ni. BJP sorkar hian Allahabad khawpui hming chu Prayagraj tiin a lo thlak tawh bawk. Thawhṭanni khan  Lucknow-a Ekana stadium pawh Atal Bihari Vajpayee  hming chawia thlak a ni  bawk a ni. 

Samajwadi party hotu leh UP chief minister hlui Akhilesh Yadav chuan UP-a BJP sorkarin  Ekana stadium hming a thlak chungchangah in saksa hming thlak ringawt loin, PM hlui hming chawi hian a khua Bateshwar-ah statium hran sa zawk mai turin a ti. BJP chuan engmah anmahni puala sak an nei lo chunga Vajpayee hming chawia stadium hming an thlak chu thil lawmawm tak a ni tho tih a sawi a, hemi rual hian an khuaah ngei stadium ṭha zawk sak sak turin a ti. 



Share this Post

Login to comment
No Comments