SC-in Rafale deal siam dan kimchang thehlut turin ti

Supreme Court chuan nimin khan sorkar laipui leh France sorkarin Rafale fighter jet leina tura inremna an siam chungchanga petition thehlutte a ngaihtuah a, sorkar lapui hnenah he inremna siam a nih dan kimchang thehlut turin a ti. 

France aṭanga Rafale fighter jet 36 lei tur inremna siam a nih chungchanga Supreme Court-ah hian public interest litigation pahnih thehlut a ni. Petition pakhatah hian inremna siam a nih dan kimchang puangzar tura sorkar laipui an phut thu tarlan a ni a, a dangah hian he inremna siam a nih dan chhui chiang tura Supreme Court enpuina hnuaiah special investigation team (SIT) din phut a ni bawk. 

Chief Justice Rajan Gogoi kaihhruai bench chuan nimin khan petition hi a ngaihtuah a ni.  Sorkar laipui chu report thehlut tur hian October 29 thleng hun a pe a, October 31-ah a ngaihtuah leh dawn a ni. 

Rafale deal hi sorkar laipui leh France sorkarin Indian Air Force te hman tura Rafale fighter aircraft leina tura defence agreement an siam a ni. Rafale fighter hi twin-engine Medium Multi-Role Combat Aircraft (MMRCA) niin, France aerospace company Dassault Aviation siam a ni. 



Share this Post

Login to comment
No Comments