UP-a rel chesualah mi pasarih thi

Uttar Pradesh-a Raebareli-ah nimin zing khan Delhi pana tlan, New Farakka Express rel pindan pariat a let a, mi pasarih an thi a, midang 30 velin hliam an tuar. 

Northern Railway Divisional Railway Manager Satish Kumar chuan rel hi West Bengal-a Malda khua aṭanga New Delhi pan a nih thu sawiin, zing dar 6.05 velah Raebareli-a Harchandpur railway station bulah a chesual niin a sawi. 

Rel chetsualna hmunah hian chhanchhuah hna thawk turin Lucknow leh Varanasi aṭangin National Disaster Response Force (NDRF) team tirh nghal an ni, doctor team tirh an ni bawk. Hliam tuarte chu a bulhnai hospital-ah dah luh an ni a, khualzin dangte chu Lucknow-ah hruai niin hetaṭang hian special train hmangin Delhi panpui an ni ang. 

Railway Minister Piyush Gopal chuan rel chetsualna thlen chhan chhui tur hian thupek atichhuak nghal a, a chhui hna hi Northern Circle-a Commission of Railway Safety-in a thawk dawn a ni. 

Prime Minister Narendra Modi pawhin a twitter-ah rel chesuala thi chhungte leh hliam tuarte a tawrhpui thu sawiin, hliam tuarte an damṭhat thuai a beisei thu a sawi. UP sorkar, Railways leh NDRF te chuan chetsualna hmunah hian theihtawpa an puih thu a sawi. 

Uttar Pradesh Chief Minister Yogi Adityanath chuan district magistrate, superintendent of police, health authority leh NDRF te chu chhanchhuah leh chhawmdawl hna thawhna kawngah an theih ang anga pui turin a ti. Rel chesuala thi chhungte chu zangnadawmna cheng nuai hnih ṭheuh pek an nih tur thu leh, hliam tuarte chu Rs 50,000 ṭheuh pek an ni dawn tih a sawi bawk. 



Share this Post

Login to comment
No Comments