Rahul-an Vallya thusawi chhui zui phut Finance Minister Jaitley-a bang turin a ngen

Congress president Rahul Gandhi chuan bank loan tam tham tak baa ramdanga tlanchhe mek, Vijay Mallya-a thusawi chungchang chu chhui zui a phut a, hemi rual hian India a chhuahsan hmaa Vijya Mallya hmutu Finance Minister Arun Jaitley chu bang turin a phut bawk. 

Bank loan cheng vaibelchhe 9,000 chuang baa thubuai eng emaw zat nei mek,  London-a tlanchhia Mallya hian reporter-ten an kawmnaah India ram aṭanga a tlanchhiat hmain finance minister nen hian an inhmu a, bank-a ba a neihte pawh chinfel dan a ngaihtuah tur thu a hrilh niin a sawi. 

Rahul Gandhi chuan Vijay Mallya thusawi chu ngaihzam mai chi a ni lo tih sawin, PM chuan hemi chungchang chhuichiang tur hian thupek a tichhuak tur a ni, a ti. Finance Minister Jaitley pawh Mallya nena an inkawm dante chhui a nih chhung chuan minister a nihna aṭang hian a bang tur a ni, a ti bawk. 

Delhi Chief Minister Arvind Kejriwal pawhin Mallya thusawi chuan a ṭhawng hle tih sawiin, an inhmuh chungchang finance minister-in a lo zep chhan a zawt let. Kejirwal-a chuan a twitter-ah, PM Modi chuan Punjab National Bank-a sum tham tak tichingpentu, Nirav Modi chu India ram a chhuahsan hmain a hmu a, Finance Minister chuan Vijay Mally chu a tlanchhiat hmain a hmu bawk a, heng meeting an neih chungchang hi ram mipuiten an hre duh a ni, a ti. 



Share this Post

Login to comment
No Comments