PM chungchanga Congress hruaitu thusawiin sawizui hlawh

Congress hruaitu Sanjay Nirupam-an Prime Minister Narendra Modi-a 'lehkha thiam lo' tia a sawi chungchang chuan sawizui a hlawh hle. 

Sanjay Nirupam hian Maharashtra sorkarin an state chhunga school-a PM Modi-a chanchin short film chhuahtir a tum chungchanga a sawiselnaah he thu hi a sawichhuak a ni. Congress hruaitu hian school-a PM Modi-a film an chhuah tum chu thil dik lo tak niin a sawi a, naupangte chu politics lak aṭangin thiar fihlim an ni zawk tur a ni, a ti. "Zirlai naupangte hian hetiang lehkha thiam lo leh ziak leh chhiar pawh thiam lo Modi te ang aṭang hian eng nge an zir chhuah ang", tiin a sawi a ni. Mi tumahin PM hian eng degree nge a neih pawh an hre lo a ni, a ti. 

Nirupam-a thusawi hi BJP hruaitute chuan na takin an sawisel nghal a, rilru buai ang hialah an chhuah a ni. 

Mahse Nirupam chuan hei hi chhang zuiin, rorellai party chuan pawl dang thusawi apiang chu an dodal tur a ni kher lo tiin, "democracy ramah chuan prime minister hi pathian a ni lo", a ti. 

Maharastra-a BJP kaihhruai sorkar chuan September 18 hian state chhunga Zilla Parishad (ZP) school-a Modi-a chanchin tarlanna short film hi chhuah vek turin a ti a, hei hi eptu party chuan an sawisel nasa hle. He film, 'Chalo Jeete Hai' hi minute 32-a rei niin, Mangesh Hadawale siam a ni.



Share this Post

Login to comment
No Comments