Sipai tihtlem rawtna Congress in sawisel

Congress party chuan Prime Minister Narendra Modi-a kaihhruai National Democratic Alliance (NDA) in sipai nuai 1.5 a tihtlem a rawt nia sawi chu an sawisel. 

PM Modi leh a kaihruai sorkar hian kum 4-5 chhungin Indian Army-a hna nuai 1.5 vel zeta tihtlem a, heng atana an sum senso cheng vaibelchhe 5,000 - 7,000 vel chu  armed force-te thuam chakna leh tihchangtlunna atana hman a tum zawka nia sawi a ni. 

Congress party thupuangtu Abhishek Manu Singhvi chuan, "Defence ministry-in Indian Army chu a sipai neih zat nuai 1.5 vela titlem tur a rawtpui nia report hi a dik a nih chuan, mi nuai chuang hna tihchhiatsaktu chu Modi-a sorkar a ni dawn lawm ni? He thutlukna hian chhungkaw nuai 1.5 te a nghawng dawn a ni", a ti. 

"Sum senso tam chhuanlama an hmang a nih chuan, NDA sorkar hian kum li leh a chanve chhungin Prime Minister thehlarna atan cheng vaibelchhe 5,000 zet a seng a, hetiang zat hi engvanginge sipaite silai leh silai mu hman tur leina atan a hman ve theih loh ang?" tiin Singhvi chuan a zawt.

Hetihlai hian sorkar laipui chuan an puhna hi phain, defence force titlem tura rawtna a awm lo niin a sawi thung. Sipaite thuam chak leh tihchangtlun chu sorkarin a ngaihpawimawh ber a ni, tiin sorkar official chuan a sawi. 



Share this Post

Login to comment
No Comments