Fuel man sang vangin PM-in cabinet meeting ko

Ramchhunga fuel man a san chhoh zel avangin hemi chungchang ngaihtuah tur hian Prime Minister Narendra Modi chuan Inrinni hian cabinet meeting pawimawh a ko. 

Fuel man san belh zel vang leh, India pawisa hlutna tlahniam zel avangin PM Modi-a kaihhruai NDA sorkar chuan beih pawh a tawk nasa hle. Hetihlai hian heng thil thleng chungchanga PM hi a la ṭawngchhuah loh avangin eptute pawhin an dem tawh hle a ni. 

Inrinni-a meeting neih turah hian Finance minister Arun Jaitley, NITI Aayog vice-chairman Rajiv Kumar, Prime Minister's Economic Advisory Council chairman Bibek Debroy leh finance secretary Hasmukh Adhia-te pawh an tel dawn a ni. 

Delhi-a designer, Puja Mahajan chuan nitina fuel man a san belh zel vang leh, sorkar laipui chu petrol leh diesel man bithlaih siam tura phutin Delhi High Court-ah petition a thehlut. Sorkar laipui chu petrol leh diesel chu nitin khawsakna atana mamawh, essential commodities anga ngai turin a phut tih a sawi. Court chuan petition chhanna hi kar li chhunga pe turin sorkar laipui a hriattir a, November 16-ah ngaihtuah a ni ang. 

Petition thehluttu hian sorkar laipui chuan khawvel huapa crude oil man a san vanga ramchhunga petrol leh diesel man a san phah nia a sawi avangin mipuite thu dik lo hrilhah a puh. Crude oil man a hniam pawhin petrol leh diesel man hi an tihhniam phah chuang lo a ni, a ti. 

State sorkarte fuel-a VAT lak titlem turin ngen

Union Minister Piyush Goyal chuan fuel man sang zel vang hian state sorkarte chu consumer-te harsatna sutkianna kawng khat atan petrol leh diesel-a value added tax (VAT) an lak zat tihniam turin a ngen. 

Rajasthan, Andhra Pradesh leh West Bengal sorkar chuan fuel-a VAT lak zat hi an tihniam tawh a, hei hi entawn turin state dangte pawh an ngen tih minister chuan a sawi. Fuel man chu khawvel huapin a sang a, sorkar laipui chuan thil awmdan hi uluk takin a thlithlai reng a, a ṭul angin hma a la zel dawn a ni, a ti. 



Share this Post

Login to comment
No Comments