Rafale deal vangin LS inkhawm titawp

Lok Sabha rorel inkhawm, nimina neih chu eptuten Rafale deal chungchanga an lungawi lohna sawichhuaka an aubuai avangin ṭum thum zet tihtawp a ngaih phah. 

Lok Sabha Speaker Sumitra Majahan-i chuan Union Finance Minister Piyush Goyal chu House-a bill pathum pharh turin a sawm a, Goyal-an Goods and Services Tax (GST) Act, 2017,  Union Territories GST Act, 2017 siamṭhatna tur leh  GST (Compensation to States) Act, 2017 siamṭhatna tur a rawn pharh hnuah Congress member-te hian an lungawi lohna thu an aupui a ni. Member-te aubuai avang hian Speaker chuan chawhnu dar 2 thleng rorel inkhawm a titawp a ni. 

Congress hruaitu Mallikarjuna Kharge-a chuan hemi hma, Zero Hour-ah Rafale jet deal chungchang hi sawichhuakin, he hi ram himna khawih thei thil a nih thu a sawi. Sorkar laipui chuFrance nena Rafale jet leina tur inremna siam chungchanga ram mipuite thu dik tawk lo hrilhah a puh. 

Kharge-a chuan Congress kaihhruai UPA sorkar hnuaiah hian Rafale deal hi aircraft pakhat Rs vaibelchhe 526 zela lei turin inremna tihfel tawh a ni tih a sawi. Mahse BJP kaihhruai NDA sorkar chuan he inremna hi siamṭhain, aircraft pakhat man hi cheng vaibelchhe 1,600 zetah a tisang a ni, a ti. NDA sorkarin cheng vaibelchhe 45,000 man Rafale deal a siam chu ramchhunga sum tihchingpenna lian ber a ni tiin sawiin, he inremna siam chungchang chhui chiang tur hian Joint Parliamentary Committee din a phut thu a sawi. 

Kharge-a thusawi zawh hian Congress member-te chu Speaker podium bulah kalkhawmin thuziakte an keng a, Parliament leh ram mipuite thu dik lo an hrilh ṭhin chu titawp tura sorkar an phut thu leh, JPC din an phut thute an aupui a ni. Hei vang hian Speaker chuan inkhawm a titawp lailawk tawh bawk a ni. 

Question Hour-ah Telangana Rashtriya Samithi (TRS) member-ten an state-a defence tana ram pek chungchanga an lungawi loh thu sawia an aubuai avangin minute 10 chhung inkhawm hi tihtawp a ni bawk. 



Share this Post

Login to comment
No Comments