Kerala-a tuilian leh leimin vangin mi 20 thi

Kerala state-ah ruahsur nasa vanga tuilian leh leimin vangin mi 20 an thi. 

Official-te chuan state chhung hmun hrang hrangah ruahsur nasa vangin tuilian leh leimin a thleng niin an sawi. Idduki district chu a tuar nasa ber niin mi 10 an thi a, heng zinga mi panga chu chhungkaw khata mi a ni. Malapupuram district-ah mi panga cu Chaliyar luilianin a hnawl avangin an thi bawk. Chaliyar lui hi kum 1994 hnua a len nasat ber ṭum a ni. 

State Power Minister MM Mani chuan tuilian vang hian Malappuram district leh a chhehvel bialah chhiatna nasa zawk ala thlen mai theih thu a sawi. Mani hian nimin zing khan chhiatna thlenna hmun hi a tlawh nghal a ni. 

Kerala Chief Minister Pinarayi Vijayan chuan an state chhung dinhmun thlirin nimin khan emergency meeting a ko nghal a ni. CM chuan harsatna tawkte ṭanpui  hna thawk turin state official leh agency hrang hrangte a hriattir a, Army, Navy, Coast Guard leh NDRF te puihna a ngen bawk. 

CM Vijayan chuan ṭanpui hna thawk turin NDRF team pathumin an state an thlen tawh thu leh, team pahnih dang pawh an thlen thuai tur thu a sawi. Tuilian an tawrh vang hian Nehru Trophy Boat Race neih tur pawh ṭhulh a nih thu a sawi bawk. 



Share this Post

Login to comment
No Comments