RS Deputy Chairman atan Harivansh Singh thlang

Rajya Sabha Deputy Chairman thar tur chu nimin khan thlan a ni a, rorellai National Democratic Alliance (NDA) candidate Harivansh Narayan Singh chu thlan tlin a ni. 

Parliament Upper House Deputy Chairman thlannaah rorellai candidate, JD(U) MP Harivansh Narayan Singh bakah eptu ṭangrualte candidate BK Hariprasad te an awm. Singh hian vote 125 a hmu a, Hariprasad hianvote 105 a hmu. Harivansh Narayan Singh hi Bihar MP niin journalist  hlui a ni a, Hariprasad hi Karnataka-a Congress MP a ni. 

Deputy Chairman post hi kumin June thla Congress MP PJ Kurien a chawlh hnu khan hnawhkhah lohin a awm a ni. 

Rajya Sabha-ah hian member 244 awm mekin, hnehna chang tur hian member 123 thlawpna hmuh a ngai a ni. Inthlan hma hian eptu leh sorkar lam chuan hnehna chang tura member zat hi an nei tling ve ve niin an sawi a,mahse vote thlaknaahhian AAP, PDP leh YSRC member-ten vote thlak loin an hai thung.

Deputy Chairman atana thlan tlin a nih hnuah Harivansh Narayan Singh hi Prime Minister Narendra Modi, eptu hruaitu Ghulam Nabi Azad leh Samajwadi Party hruaitu Ram Gopal Yadav-te chuan lawmpuina an hlan nghal a ni. Nimina Rajya Sabha inkhawmah hian damlohna avanga thla thum zet chawl, Union Minister Arun Jaitley pawh a inlan thei a ni.

Rajya Sabha Deputy Chairman thar, Harivansh Narayan Singh hi kum 62 mi niin, kum 2014 April khan a ṭum khatna atan Rajya Sabha member atan thlan tlin a ni. Harivansh hi Economics-ah post graduate niin Journalism-ah diploma a nei bawk. Rajya Sabha rorel inkhawmah member tel ṭha ber zinga miin a attendance recort hi 89% a ni. 



Share this Post

Login to comment
No Comments