RSS-in mipui ṭhendarh a tum : Rahul Gandhi

Congress president Rahul Gandh chuan India ram chu mi pathum chauh rorelna hnuaiah a awm thei lo a ni tiin,  eptute chu central-a BJP kaihhruai sorkar dodal turin an thawkho mek a ni, a ti. Mi pathum tia a sawite hi Prime Minister Narendra Modi, Bharatiya Janata Party (BJP) president Amit Shah, leh Rashtriya Swayamsevak Sangh (RSS) chief Mohan Bhagwat te an nih thu a sawilang bawk. 

Gandhi chuan Congress party-a Other Backward Classes (OBC) cell-in inkhawm an buatsaiha thu a sawinaah he thu hi a sawi a ni. He inkhawm, OBC Sammelan (gathering) hi New Delhi-a Talkatora Stadium-ah Thawhṭanni khan neih a ni. 

Congress president chuan, "Eptu pawl zawng zawngte chu an thawkho mek a, thla ruk thla sarih hnuah chuan Narendra Modi, Amit Shah leh Mohan Bhagwat-te chuan India chakna chu an hre thei dawn a ni. Mi pathum chauhin he ram hi an hruai thei lo tih an hre dawn a ni", a ti. 

Gandhi chuan RSS chu OBC te ṭhendarh tumah a puh bawk a, OBC te inkara hem thlak an tum a ni, a ti. India in hma a sawn zel dawn a nih chuan mipuite enhran leh zahloh bik an awm tur a ni lo tiin, Congress party chuan OBC te thuamchak chu a tum a ni, a ti. Congress chuan an dikna chanvo neihte a pe dawn tih sawiin,  an mamawh hun apiangah an tan an ding zel dawn tih an sawi. 



Share this Post

Login to comment
No Comments