Delhi state-a hlankai a nih chuan Kejriwal-an BJP tana campaign a tiam

Delhi Chief Minister Arvind Kejriwal-a chuan Delhi chu state puitlinga hlankai a nih chuan nakkuma Lok Sabha inthlanpui neih turah Bharatiya Janata Party (BJP) tana a campaign tur thu a sawi. 

Thawhṭanni-a assembly inkhawmah Kejriwal-a chuan he thu hi sawichhuakin, " Kum 2019 inthlanpui neih hmaa Delhi chu state pek an nih chuan Delhi mipuite chuan BJP an vote ṭheuh ang tih kan sawi duh a ni. An tan kan campaign bawk ang. Mahse hei hi an ti duh lo a nih chuan Delhi mipuite chuan BJP chu Delhi chhuahsan tura an duhna thuziakte an tarchhuak thung dawn a ni", tiin central-a BJP kaihhruai sorkar chu a cho. Assembly-ah hian Delhi chu state puitlinga hlangkai tura an phutna resolution chu an pass nghal bawk a ni. 

India ram khawpui, Delhi hi union territory a la nih avangin thuneihna tam tak chu sorkar laipui thuneihna hnuaiah a awm a, hei vang hian Delhi sorkar leh sorkar laipui hi Delhi-a rorelna kalpui dan chungchangah an inep fo a ni. Delhi Police leh ram kaihhnawih thilte hi sorkar laipui hnuaiah a awm a ni. 

CM Kejriwal-a chuan Lieutenant Governor Anil Baijal leh central investigating agecy-te chu a kaihhruai sorkar hnathawh turte tihbahlah-ah puhin, Thawhṭanni zan khan LG chenna inah hian lungawih lohna an lo lantir tawh  bawk.

Delhi assembly hian a hma pawhin state-a hlankai phutna resolution hi a lo pass tawh a ni. Kum 1988 han Sahih Singh a chief minister laiin resolution hi an pass a, draft bill chu sorkar laipuiah an thehlut a ni. 

Delhi chief minister chuan Prime Minister Narendra Modi chuan kum 2014 inthlanpui neih dawna state-a hlankai a lo tiam thu a sawichhuak bawk. Hei hi BJP  MLA leh eptu hruaitu Vijender Gupta chuan chhangin, Kejriwal-a chuan state puitlinga hlankai chungchang chu a ngai pawimawh tak tak a nih chuan a MP te kaltlangin Parliament-ah a sawi mai tur a ni, a ti. Mahse hei hi a tum tak tak lo a, kum thum leh thla li hun ala neih chu hman zawh ngei duhin, a kaihhruai sorkar dik tawk lohnate thup a, mipuite rilru hruai penna atan a hmang mai a ni, a ti. 



Share this Post

Login to comment
No Comments