Agni-V ballistic missile enchhin leh a ni

Nimin zing khan nuclear ralthuam phur thei, Agni -V long range ballistic missile chu a vawi hnihna atan Odisha tuipui  kama Wheeler Island aṭangin enchhin a ni. 

Zing dar 8.50 khan km 5000 chuang kapthei, Agni-V missile hi Integrated Test Range (ITR)-a launch complex-4 a mobile launcher aṭangin kah chhuah a ni. Agni-V hi surface-to-surface missile niin, ton khat aia tam nuclear ralthuam a phur thei a ni. Radar leh network system hrang hrang aṭanga data dawnte endik a nih hnuah, an enchhinna result kimchang chu hriat a nih tur thu defence lam thuneitute chuan an sawi.

Agni-V missile enchhinnaah hian defence scientist leh expert-te'n an telpui. Nikum April 19 khan a vawikhatna atan long range missile hi hlawhtling taka enchhin a lo ni tawh a ni. He missile hi meter 17-a sei leh meter 2-a zau a ni a, ton 50 vela rit a ni. A hmaa Agni series-te ang loin, Agni-V ah hian navigation, guidance, warhead leh engine tan technology thar dah a ni a, heng technology thar eng emaw zat hi a ṭum khatnaah khan hlawhtling taka enchhin an lo ni tawh. 

India hian km 700 a thui kap thei Agni-1, km 2000 kap thei Agni-2, km 2500 aṭanga 3500 thleng kap thei Agni-3 leh Agni-4 a lo nei tawh a. Agni-V pawh hi duh anga enchhin an nih hunah, service ho kutah pek a ni ang.


Share this Post

Login to comment
No Comments