Manmohan Singh-an PM Modi-a ṭawngkam a sawisel President Ram Nath Kovind hnenah lehkha thawn

Prime Minister hlui Manmohan Singh chuan President Ram Nath Kovind-a hnenah lehkha thawnin, Prime Minister Narendra Modi-an Karnataka-a a campaign-naa Congress hruaitute chungchang a sawinaa a ṭawngkam hmante chu sawiselin, fimkhur tura zilh a ngai tih a sawi. 

He lehkha hi May 13 khan President hnenah hian thawnin, Singh bakah Congress hruaitu hlun P Chidambaram, Anand Sharma, Karan Singh leh midangten hming an ziak. Lehkhathawnah hian May 6-a PM-in Hubli-a election rally neihnaa a thusawi chungchang an tarlang.

Modi hian Congress president Rahul Gandhi leh United Progressive Alliance (UPA) chairperson Sonia Gandhi-te chu vauin, vantlang hmuha mawi leh pawm theih chin bak pel lo turin a ti a, hei hi an zawm lo a nih chuan a man an pek let a ngai tiin a sawi a ni. Modi hian a hminghmerhin lam ri lo mah se, a thusawiah hian "Congress  ma (Congress mother) leh fapa" tiin a sawi a ni. 

Singh leh Congress hruaitute chuan a hma lama prime minister lo ni tawh zawng zawngte chu vantlang leh private inkhawmahte pawh  zahawm tak leh chethmang pawh mawi taka an awm ṭhin thu an sawi a, PM-in Congress hruaitu vauna  thu a chhakchhuak mai chu an dem takzet tih an sawi.  PM Modi-a thusawi duh dan chuan mi tluklehdingawn 1.3 zet awmna democracy ram hruaitu  ṭawngkam hman dan tur a ni lo tiin, vantlang inkhawm emaw, private inkawm emaw pawh nise hetiang thil hi pawm theih a ni lo tih an sawi. A ṭawngkam hman chu mawi lo leh inhmusitna, boruak muanawm tichhe thei a ni, an ti. 

President chu Congress party leh party dang hruaitute bakah midang chungah pawh hetiang ṭawngkam mawi lo leh invauna lam hawi chi hmang lo tura Prime Minister hrilh tura an phut thu an lehkha thehluhah hian an tarlang. 



Share this Post

Login to comment
No Comments