Surat-ah pawikhawihna rapthlak thleng ve leh Kathua pawngsual thubuai state pawna ngaihtuah ngen

Jammu and Kashmir-a Kathua district-a hmeichhe naupang, kum riat mi rukboa pawngsual rawn a nih hnua thah a nih avanga ram pum mipuite thinurna chawh thoa a awm lai mekin, Gujarat-a Surat-ah hetiang bawk pawikhawihna rapthlak tak thleng hmuhchhuah leh a ni. 

Tun thla tir lam khan Gujarat-a Surat biala Bhestan hmunah hmeichhe naupang pakhat tu tih hriat loh ruang hmuh a ni a, a taksaa hliam hnuhma 86 zet hmuh niin, official-te chuan he hmeichhe naupang hi thah a nih hmain hun eng emaw chen hren beha pawngsual a tawk niin an ring a ni. He hmeichhe naupang hi kum 9-11 inkar vel nia rin a ni a, April 6 khan cricket ground bula hnimbuk karah a ruang hi hmuh a ni. 

Pandesara police station inspector KB Jhala chuan ruang hi tunge a ni tih hriat tumin police-ten an chhui mek tih a sawi a, social media lamah pawh a thlalak hi thawnin, amah hre theitu an zawng mek niin a sawi. A chanchin hrilh thei hnenah lawmman Rs 20,000 pek an tiam bawk. A ruang endiktu, Dr Ganesh Govekar chuan hmeichhe naupang ruangah hian hliam hnuhma 86 zet a awm thu leh, a lan danin kar khat chhung vel kutthlaka khawih ṭhin nia a lan thu a sawi. Police-te chuan he pawikhawihna thleng chungchangah hian mi tu tih hriat loh lakah thubuai an ziaklut tawh a ni. 

Hetih lai hian Kathua-a pawngsual leh thah tawktu hmeichhe naupang chhungte chuan an thubuai chu J&K state pawn lama sawn phalsak turin Supreme Court-ah an ngen. 

Kumin January 10 khan J&K-a Kathua district-ah Muslim mi, hmeichhe naupang kum riat mi Asifa chu rukbo niin, ni eng emawzat hrenbehin pawngsual rawn a ni a, pawngsualtu zingah hian police officer-te pawh an tel. Hren beh a nih chhung hian damdawiin an hrai rui a, ei tur pawh pek a ni ngai lo. Kar khat hnuah a ruang hi hmuh a ni. He pawikhawihna rapthlak tak thlenga inhnamhnawih mi pariat chu man an ni tawh a, man zinga mi revenue department official hlui chuan he thil hi Asifa-te hnema, Bakherwal hnam ho tihṭhaihna atana ti an nih thu leh, Rassana bial aṭanga an umchhuah theih nana ti an nih thu a sawi. Bakherwal hnam, Muslim mi chhungkaw tlemte chu Hindu tamna bialah hian an khawsa ve a, hei hi Hindu ho hian an ngaithei lo hle a ni. Pawngsualtute laka thubuai ziahluh tum hi Kathua District Bar Association leh Jammu-a High Court Bar Assocation chuan dodalin hna an thawk duh lo a,  pawngsual tawktu chhungte ukil hman tur pawh an lo dansak a ni. 

Asifa-i chhungte ukil chuan thil awmdan an thlirin state chhungah thubuai chu ṭha taka ngaihtuah theih a nih a ring lo tih an sawi a, hei vang hian state dangah thubuai hi sawn mai tura an ngen thu a sawi. Kar kalta Zirtawpni khan pawngsualtua puh zinga mite thlavang lo hauhsaktu, J&K-a BJP minister pahnih chuan an party-in ti tura an hrilh avangin minister aṭanga banna an thehlut. Industries Minister Chandra Prakash Ganga leh Forest Minister Lal Singh-te hi pawngsualtua puhte thlavang hauhna kawngzawh, Hindu Ekta Manch-in a buatsaihah an tel a ni. 

Nimin tlai khan ramchhunga khawpui lianahte Kathua-a hmeichhe naupang pawngsual leh, Uttar Pradesh-a Unnao-a hmeichhe tleirawl pawngsualna thleng duh lohna lantirin bati chhi a kawngzawh huaihawt a ni. 

Hetih lai hian nikum June thlaa UP-a Unnao khuaa tleirawl kum 16 mi pawngsualtua puh, BJP MLA Kuldeep Singh Sengar-a chu Zirtawpni khan man niin ni sarih chhung police kuta awm tura thawn a ni. Sengar hi darkar 15 chhung thu zawhfiah a ni. He thubuai hi Central Bureau of Investigation (CBI) kutah hlan a ni tawh a, CBI hian Sengar-a hnena hmeichhe hruaitu nia sawi, Shashi Singh pawh an man tawh bawk. Allahabad High Court chuan CBI hnenah May 2-a report thehlut turin a hriattir tawh bawk. 



Share this Post

Login to comment
No Comments