Kum tling loa motor khalh nu leh pate man

Hydrabad-ah chuan kum an tlin hmaa an fate motor khalh phalsaktu, nu leh pa 69 manin jail-ah tantir an ni. 

Hyderabad Traffic Police (HTP) chuan kum tling loa motor khalh dap chhuah hna an thawk mek a, driving licence la nei pha lo kum 14-16 inkar bike, scooter leh car khalh eng emaw zat manchhuah an ni tih  Deputy Commissioner of Police (Traffic) A V Ranganath chuan a sawi. 

Driving licence la nei pha lo, kum tling loa motor khalh an man nu leh pate hi local court-ah koh ṭhin a ni a, ni khat aṭanga ni thum chhung jail-ah tantir an ni ṭhin. Hei bakah hian pawisa chawitir an ni bawk. Nu leh pate hi an fate kum tling lo chunga motor khalh an phalsak vangin MV Act Section 180  (Allowing unauthorised persons to drive vehicles) hnuaiah thubuai siamsak an ni. Kum tling loa motor khalte chu Act section 181 (driving withou licence) huaiah thubuai siamsak niin, mi pathum chu hrem an ni tawh a, juvenile home-ah dah an ni. 

HTP hian kum tling loa motor khalh dap chhuah hna hi February chawlhkar hmasa ber aṭang khan an nei ṭan a, kumin kumtluana beih chhunzawm an tum. 



Share this Post

Login to comment
No Comments