RS inthlan neih tura atana candidate puang

State pakuaa Rajya Sabha inthlan neih tur atan BJP, Congress, RJD, TRS leh JD-U te chuan an candidate turte Pathianni khan a puang. 

March 23 hian state pakua-ah Rajya Sabha member 58 thlan a ni dawn a ni. He inthlana chuh tumte tan March 12 thleng nomination thehluh theih a ni a, inhnukdawk duhte tan March 15 thlen hun pek an ni bawk. 

Inthlanna neihna turte chu Uttar Pradesh-ah seat 10, Bihar leh Maharashtra-ah seat ruk ve ve, Madhya Pradesh leh West Bengal-ah seat nga ve ve, Gujarat leh Karnataka-ah seat li ve ve, Odisha, Rajasthan, Andhra Pradesh leh Telangana-ah seat thum ṭheuh, Jharkhand-ah seat hnih leh Haryana, Chhattisgarh, Himachal Pradesh leh Uttarakhand-ah seat khat ṭheuh a ni. 

BJP chuan candidate tur mi 18 hming a puang a, an zingah hian Maharashtra chief minister hlui Narayan Rane pawh a tel. BJP General Secretary Saroj Pandey pawh Chhattisgarh-ah ading dawn a, party medial cell convenor Anil Baluni chu Uttarakahnd-ah dingin independent RS member Rajeev Chandrasekhar chu BJP ticket-in Karnataka-ah a ding bawk ang. 

Congress chuan candidate tur mi 10 hming a puang a, union minister hlui Naranbhai Rathwa chu a term nga-na turin Gujarat-ah a ding dawn a, senior journalist Kumar Ketkar chu Maharashtra-ah a ding ang. Senior lawyer Abhisek Manu Singhvi chu West Bengal-ah a ding dawn bawk a ni. 

TMC chuan candidate pali puangin, an party hotu Mamata Banerjee-i chuan Singhi hi an party-in a thlawp tur thu a sawi. 

JD(U) pawhin party candidate atan Mahendra Prasad leh Bashistha Narain Singh te ruat an nih thu a puang bawk. 

RJD chuan Bihar-a Rajya Sabha inthlan neih tura candiate atan party thupuangtu Manoj Jha leh Katihar Medical College and Hospital managing director Ashfaque Karim te a ruat. 

Telanga-a rorellai Telangana Rashtra Samithi (TRS)  pawhin candidate tur mi pathum hming a puang bawk. 



Share this Post

Login to comment
No Comments