PM Modi-in Class 6-12 zirlaite hun hmanpui dawn

Prime Minister Narendra Modi hian February 16 hian Class 6 -12 zirlai naupangte tan  ‘Pariksha Pe Charcha’ programme a hmang dawn. 

Central Board of Secondary Education (CBSE) chuan PM programme  hman tur hi naupang tam thei ang berin an en theih nan ruahmanna siam turin school-te a hriattir nghal a ni. CBSE  board chuan school hrang hrang hnenah hriattirna pein, chawhma dar 10.30 aṭangin PM hian hun a hmang dawn tih a sawi a, Class 9-12 zirlaite chuan PM hi zawhna an zawt thei dawn a, an zawhnate chu word 100 aia tam loa ziakin, mygov.in website-ah thehlut turin a ti a ni. 

School hrang hrangte chu programme hi an en theihna turin television sets, internet, radio set leh mamawh dangte pawh lo buatsaih lawk turin hriattir an ni. He programme hi DD News, DD National leh DD India pawhin an pe chhuak dawn a, PMO, HRD Ministry, Doordarshan, YouTube leh mygov.in website aṭangin live-in pekchhuak a ni bawk ang. 

‘Pariksha Pe Charcha’ programme buatsaih thlirtu zirlai naupang awmkhawmte thlalak leh video clip-te pawh thehlut turin school hrang hrangte chu hriattir an ni bawk a ni. 

Kum 2014 khan PM hian Prime Minister atana lakluh a nih hnu lawkah zirtirtute pualin hetiang programme hi a lo buatsaih tawh bawk.



Share this Post

Login to comment
No Comments