TN Assembly-a Jaya-i thlalak dah eptu lamin duh lo

Tamil Nadu-a All India Anna Dravida Munnetra Kazhagam (AIADMK)  sorkar chuan an party hruaitu leh chief minister hlui J Jayalalithaa-i thlalak chu state Assembly-ah a dah a, hei hi eptu party Dravida Munnetra Kazhagam (DMK) chuan na takin a sawisel. 

Pathianni khan Assembly speaker P. Dhanapal chuan CM hlui Jaya-i thlalak hi a tlangzarh a, thlalak tlangzarh inkhawm an buatsaih hi DMK chuan an boycott thung. DMK chuan Jaya-i chu a sum lakluh phu loa hausaa puha eiruk thubuai siamsakah Supreme Court-in thiam loh a chantir a ni a, a thlalak Assembly-a tar chu Assembly tan pawha ni duhawm lo tak a ni, a ti. 

DMK working president MK Stalin chuan House Speaker chuan Assembly chhunga thlalak tar tur tlangzarh turin thuneihna a nei lo niin a sawi bawk. Nimin khan DMK hian Jaya-i thlalak hi lathla leh turin Madras High Court-ah ngenna an thehlut a ni. Petition thehluhah hian Jaya-i chu eiruk thubuaia thiam loh chang, special court-in thiam loh a chantir hnuah pawh Supreme Court pawhin thiam loh a chantir zui leh a ni, an ti. Eptu party dang, CPI(M) pawhin DMK thiltih hi an thlawp tih an sawi. 

Hetih lai hian AIADMK convenor leh Chief Minister O Panneerselvam chuan a twitter-ah an state tana Jaya-i hnathawh hrang hrangte fakin, hun lo taka a liam chu pawi a tih thu a sawi. 



Share this Post

Login to comment
No Comments