Rahul Gandhi-an RSS hotu thusawi chhang let

Congress President Rahul Gandhi chuan Rashtriya Swayamsevak Sangh (RSS) hotu Mohan Bhagwat-an RSS chuan ni thum chhung lekin sipai a din thei ang tia a sawi chu chhangletin, RSS hotu thusawi dan chu India mite hmuhsitna a ni tiin, a thusawi avang chuan zak hle turin a ti. 

RSS hotu Bhagwat thusawi chu ram himna atana thawktu sipaite leh India mipuite hmusitna a ni, tiin Rahul Gandhi chuan a sawi a, ram tana nun hlantu martar-te zahlohna lian tak a ni, a ti. 

Mohan Bhagwat hian Bihar-a Muzaffarpur-a public meeting neihnaah, RSS chuan ni thum chhung chauhin ram chhanhim tura indona hmachhawn turin sipai a din thei ang tiin a sawi a, hetihlai hian Army chuan ni thum chhunga an tih theih hi thla 6-7 chhungin an ti thei chauh dawn niin a sawi bawk. Constitution-in a phalsak a nih chuan RSS chuan ramin dinhmun harsa a tawh chuan ram tana bei turin a thawkchhuak thei reng tih a sawi bawk. 

Eptu lamten an sawisel hnuah BJP chuan RSS hotu thlavang hi a hauhsak nghal a, Civil Aviation Minister Jayant Sinha chuan Bhagwat-a thusawi an sawichhawn dan hi a dik tawk lo nia sawiin, sipaite chu englai pawhin an thlawp reng tih a sawi. MoS Home Affairs Kiren Rijiju pawhin Indian Army-te chu an chhuang hle tih a sawi bawk. 



Share this Post

Login to comment
No Comments