UIDAI in Virtual ID siam thar

English chanchinbuin mi pakhatin minute 10 chhung lekin Rs 500 in mi tupawh Aadhaar data kimchang a neihsak theih tur a sawi chungchang a chhuah chuan buaipui a hlawh a, hei hi mipuite privacy khawih chingpen sak theihna a ni, tiin Unique Identification Authority of India (UIDAI) pawhin sawisel a hlawh pha hle. Hemi hnu, Nilaini khan UIDAI chuan midangten Aadhaar data an lo hmuh ve tur venna kawng khat atan temporary 'Virtual ID' a siam. 

UIDAI chuan temporary Virtual ID hi March thla aṭangin a tichhuak dawn a ni.  Aadhaar card holder mi vaibelchhe 119 chuangte chuan an Aadhaar number, digit 12 aiah chuan he temporary number digit 16 hi bank leh telecom service provider-te hnenah an hmang thei dawn a ni. 

Service provider hrang hrangte chu hemi atan hian an system-te upgrade tura tih an ni bawk. Virtual ID hi duh zat zat a hman theih a, a nih loh pawhin unique ID hman hnuah a tharin a thlak theih zel dawn bawk. Official-te chuan Virtual ID aṭang hian mimal Aadhaar number hriat sak theih dan tur hi a awm lo niin an sawi. 

Hetih lai hian UIDAI in temporary Virtual ID siam a tum hi awmzia a nei dawn lo nia sawiin  Supreme Court-ah petition a lut nghal. Petition thehluttute chuan virtual ID  hi enchhin pawh a ni lo a, awmzia a nei lo niin an sawi. UIDAI chuan Aadhaar chungchanga a policy fel tawk lote thup nan enchhinna pawh  awm lo technology thar hman a tum mai a ni, an ti a, Virtual ID siam tum chu an dodal zel tur thu an sawi. 

Chenna nei lo, Aadhaar nei lote chungchang sorkar zawtfiah :

Supreme Court chuan sorkar laipui ukil hnenah chenna tur in nei lo, Aadhaar nei lote chu sorkarin ram mi leh saah a chhiar tel em tih a zawt.

Additional Solicitor General Tushar Mehta hnenah hian Aadhaar number neih dawn hian address mumal tak ziah tel a ngaih vangin, chenna nei lo leh vakvaite chuan engtinnge Aadhaar hi an neih ve theih dawn tiin court chuan a zawt a ni. 

Metah chuan thingtlang lamah chenna in nghet nei, khawpui pem tam tak chuan chenna mumal nei loin an awm a, hengte hian in leh lo nghet an neihna hmuna mi chu hmangin Aadhaar number hi an nei thei ang a, hemi hnu hian sorkar scheme hnuaia hamṭhatna te pawh an dawng thei ang, a ti. 



Share this Post

Login to comment
No Comments