RK Nagar bypoll : Vishal-a nomination hnawlsak

Tamil Nadu Chief Minister hlui J Jayalalithaa-i bial thihsan, RK Nagar constituency by-election chu December 21 hian neih a ni dawn a, inthlana chuh tum zinga mi actor Vishal-a nomination thehlut chu Returning Officer chuan a hnawlsak. 

Thawhlehni khan Vishal hian nomination paper a thehlut a, mahse candidate atana thlawptu mi 10 an awm a ngaih laiin, Vishal-a thlawpna thehlut hi pariat chauh an awm nia sawi a ni. Nomination hnawlsak a nih vang hian Vishal hian election office kawtah lungawi lohna a lantir a, returning officer nen pawh an inhnial buai zui a ni. Actor chuan amah thlawptu mi pahnihte chu election office aṭang hian vau leh umchhuah an nih thu a sawi a, inthlan chuh ve thei loa siam an tum niin a sawi. 

Poll body chuan Jaya-i vahnu, Deepa Jayakumar-i nomination pawh a hnawlsak bawk a, hetihlai hian rorellai AIADMK candidate E Madhusudhanan, DMK candidate N Marudhu Ganesh leh BJP candidate K Nagarajan bakah independent candidate 50 chuang nomination paper chu pawmsak an ni thung. 

RK Nagar by-election neih tur atan hian mi 145 in nomination paper an thehlut a, an zinga 72 chu pawm niin, 73 chu hnawl a ni thung. Candidate inhnuhdawh duhte tan vawiin thleng hun pek an ni bawk. 



Share this Post

Login to comment
No Comments