PM Modi-an Indian scientist-te hmu

ASEAN Summit hmang tura Philippines-a zin, Prime Minister Narendra Modi-a chuan nimin khan International Rice Research Institute (IRRI) a tlawh a, he institute-a thawk Indian scientist-te a hmu nghal a ni. 

IRRI hi Manila aṭanga km 65-a hlaa awm, Los Banos-a awm a ni. He hmunah hian Indian scientist eng emaw zat an thawk a ni. IRRI hian ram 17-ah office a nei a, rice variety hrang hrang an siam a ni. India ramah hian Varanasi-ah IRRI regional centre hi din a ni tawh a ni. 

PM Modi hian ASEAN Summit hmang turin Pathianni khan Manila a thleng a, hemi zan hian Philippines President Rodrigo Duterte chuan summit hmang tura kal hruaitu hrang hrangte tan zanriah a buatsaihsak a, he hunah hian Modi-a bakah US President Donald Trump, China Prime Minister Li Keqiang leh Russia Prime Minister Dmitry Medvedev-te pawh an tel a ni.

Nimin aṭang khan summit hi ṭan a ni a, summit neih kar lakah PM Modi leh US President Donald Trump te chuan meeting an nei a, ram pahnihte inlaichinna leh thawhdunna chungchangte an sawidun. Meeting zawha chanchinthar lakhawmtute'n an kawmnaah, Modi chuan President Trump nen inkawmna hun an nei thei chu lawmawm a tih thu sawiin, India leh US inlaichinna chu a ṭhang lian zel tih a sawi. Hruaitu pahnihte inkawmna kimchang hi tarlan a ni lo a, mahse firfiakte beih let dan chungchang te, insumdawn tawnna leh security dinmunte an sawidun nia rin ani. 



Share this Post

Login to comment
No Comments