Rajasthan doctor-ten nawrh titawp

All Rajasthan In-Service Doctors’ Association (ARISDA) in an thil beisei tihhlawhtlin phuta ni sarih zet nawrh an huaihawt hnuah state sorkar nena inremna an siam tak avangin Pathianni zan aṭang khan nawrh an tihtawp ta. Rajasthan doctor-te hian thil phut 33 zet neiin, heng zingah hian hlawh tihsan leh promotion pekte a tel a ni. Hei bakah  hian in-service doctor atan cadre hran siam te, doctor-te tan grade pay benefit Rs 10,000 siam te, sorkar hnuaia health centre hrang hrangte single shift-a enkawlte a tel bawk. November 6 aṭang khan nawrh huaihawt ṭanin, state sorkar hnuaia thawk doctor 8,000 chuangin an zawm a ni.  Nawrh an huaihawt chhung hian  Rajasthan Essential Services Maintenance Act (RESMA) hnuaiah doctor 14 man an ni. 

Rajasthan Health Minister Kali Charan Sharaf chuan ARISDA aiawh mi panga-te chu meeting neihpuiin, doctor-te thil phut hrang hrangte an ngaihtuah a ni. Tlai dar 2 aṭanga zan dar 11 thleng meeting an neih hnuah inremna an siam thei ta a ni. Sorkar chuan doctor-te thil phut tam zawk chu ngaihtuahsak a remti a ni. 

In-service doctor  te nawrh huaihawt hi resident doctor leh senior resident doctor-ten an thlawp a, ni thum chhung nawrh huaihawt hi an zawm hman a ni. Nawrh tihtawp a nih vangin nimin aṭang khan doctor-te chuan dan pangngaiin an hna an thawh chhunzawm leh nghal a ni. 



Share this Post

Login to comment
No Comments