AP-a lawng chesualah mi 19 thi

Andhra Pradesh-a Krishna  lui-ah lawng chesualin a let a, mi 19 ruang hmuh a ni tawh. 

He lawngah hian mi  38 an chuang a, Pathianni zan khan Vijayawada khaw bulah a chesual a ni. Lawnga chuang mi 15-te chu chhanchhuah an ni a, chin hriat loha awmte hi zawn nghal niin Pathianni zan khan ruang 16 lakchhuah a ni a, nimin zing khan ruang pathum  hmuh belh leh a ni. 

Lawng hian lui kual laiah tui chhunga lei tlang a su a, hetihlai hian lawnga chuangte hi Pavitra Harati enchian tuma a sir khata an awmkhawm lai anih vangin a let zui ta niin police-te chuan an sawi. 

Vijayawada Police Commissioner Guatam Sawang chuan he lawng hian valid license pawh a nei lo niin a sawi a, lawngah hian passenger-te tan life jacket pawh dah a ni lo, a ti. Lawng operator lakah hian thubuai ziahluh nghal a ni a, lawng khalhtu pawh biboin, police-te'n man tumin an zawng mek a ni. 

Lawng chesuala chuangte chhanchhuah hna thawk tur hian member 30 awmna National Disaster Response Force leh member 45 awmna State Disaster Rescue Force (SDRF) tirh nghal an ni. 

Chief Minister N Chandrababu Naidu, Deputy Chief Minister (Home) N China Rajappa, Opposition leader Y S Jaganmohan Reddy, state BJP president K Hari Babu leh hruaitu dangte chuan chetsualna thleng hi pawi an tih thu an sawi a, CM chuan lawng chesuala thi chhungte chu cheng nuai nga ṭheuh pek an nih tur thu a puang nghal bawk. 



Share this Post

Login to comment
No Comments