AIADMK-in general secretary aṭangin Sasikala-i ban

Tamil Nadu-a rorellai, AIADMK chuan an party general secretary post a titawp a, party general secretary ni lai VK Sasikala-i pawh a ban nghal bawk. 

Thawhṭanni-a AIADMK general council meeting chuan an party hruaitu hlui, nikum December thlaa thi J Jayalalithaa-i chauh chu general secretary ni thei a ni tih sawiin, he post hi midangin an chelh zui an remti tawh dawn lo tih a sawi a, he post pawh hi a titawp a ni. Mahse party thutlukna siam hi Madras High Court-in a pawmsak leh phawt a ngai ang. 

Meeting hian Sasikala-i'n party deputy general secretary atana a vahpa, TTV Dinakaran a ruatna pawh a hlihsak nghal bawk. Jaya-in party office bearer atana a lo ruat tawhte dah let leh vek a rel a, Dinakaran-a'n party hminga thutlukna a lo siam tawhte sut leh vek a nih tur thu a sawi bawk. 

Party meeting-ah hian member 2,000 vel an tel a, tunhnaia AIADMK hnuaia pawl pahnih, Chief Minister E Palaniswamni leh CM hlui O Panneerselvam-a kaihhruai pawlte inchhunfin pawh an nemnghet nghal a ni. 

Nikum December thlaa Jaya-i a thih khan hun rei tak a hnungzuitu leh a ina a chenpui, VK Sasikala-i chu amah thlaktuah hmangin party hruaitu atan dah zui a ni a, chief minister atana lakluh tuma buatsaih a nih laiin a sum lakluh phu loa hausaa puhna thubuai thiam loh chantir niin, Bengaluru-ah tantir a ni zui bawk.

AIADMK party hotu atana Sasikala-i dah a nih chungchangah party chhungah inrem lohna awmin, Sasikala-i lamṭang leh CM hlui Panneerselvam lamṭangte an inṭhen zui a ni. Mahse Sasikala-i jail-a dahluh a nih hnua, a lamṭang pawl hruaitu CM Palaniswamni leh Panneerselvam te chuan inrem dan kawng zawngin inbiakna an nei chhunzawm a, inchhunfin an remti ta a ni. Pawl pahnihten inbiakna an neihah hian Panneerselvam-a lamin party hruaitu aṭanga Sasikala-i ban an phut a ni.



Share this Post

Login to comment
No Comments