HP-in zirtirtu inchei dan tur thupek siam

Himachal Pradesh Higher Education Department chuan state chhunga school zawng zawng hnenah hriattirna pein, zirtirute chu hnathawhna hmunah zahawm taka inchei turin a hriattir. 

Higher Education Deparmtent director, BL Binta chuan zirtirtute hian school hours laiin thawmhnaw holam taka inchei mai an ching a, hei hian zirlaiteah nghawng ṭha lo tak a nei thei a ni, a ti. 

School hrang hrang hnena hriattirna pekah hian zirtirtute tana dress code siam chu khauh taka vawng tura tih an ni a, school hrang hrangte hi endik ṭhin an ni dawn a ni. Sorkar chuan school zirtirtu, a bikin Himachal Pradesh School Board of Education hnuaia inziaklut school-a thawkte tan uniform siam a tum thu a sawi bawk. 

Higher Education Department hian nikum khan school chhungah mobile phone hman a lo khap tawh bawk a, school hour laia zirlai zinga phone hmang an hmuhte chu an phone an mansak ṭhin bawk. 

Himachal Pradesh High Court chuan a hmain court hearing naa tel turte inchei dan tur a lo duang tawh bawk a, court-a kal turte chuan thawmhnaw rang lam leh jeans te inbel lo tur leh, zahawm taka inthuam turin a ti a ni. Jharkhand High Court pawhin hmeichhiate chu court-ah sari rawng lar lutuk inbel lo turin a lo ti tawh bawk a, hei hian sorkar hnathawkte chu court-ah an inlanin jeans, thawmhnaw thui maksak, T-shirt leh thawmhnaw rawng lar lutuk ha lo turin a ti a ni. 



Share this Post

Login to comment
No Comments