President election : SP ngaihdan phir

President thlanna neih turah Samajwadi Party ngaihdan a phir a, an party patron Mulayam Singh Yadav leh party chief Akhilesh Yadav lamṭangte chu candidate thlawp tur chungchangah an ngaihdan a inang lo. 

Party chhunga ngaihdan inang lo hian president thlan turah danglamna thlentir dawn lo mah se, he thil hian an party chhungah nghawng a neih len hle rin a ni thung. BJP kaihhruai NDA-in president candidate atana Ram Nath Kovind a puan hnuah khan, UP Chief Minister Yogi Adityanath-a'n Prime Minister Narendra Modi-a puala June 20-a zanriah a buatsaihah Mulayam Yadav chu a tel a, mahse Akhilesh Yadav leh Mayawati-te rawh chu an tel ve duh lo. SP hruaitu hlun hian Kovind chu candidate ṭha tak niin a sawi a ni. 

Hetih lai hian eptu ṭangrual candidate, Meira Kumar-i chuan kar kalta Zirtawpni khan SP headquarters-ah Akhilesh hi a hmu a, BSP  hotu Mayawati-i pawh a lo hmu tawh bawk. Akhilesh hian an party MLA-te chu Meira Kumar-i vote tur hian a hrilh niin SP thupuangtu Rajendra Chaudhary chuan a sawi. 



Share this Post

Login to comment
No Comments