Sorkarin thi tura hremna pek mi pahnih tan zahngaihna dilsak dawn

Sorkar laipui chuan Qatar Supreme Court-in tualthah avanga tihhlum tura an chungthu a relsak, Tamil Nadu state mi pahnihte tan zahngaihna a dilsak dawn. 

Tamil Nadu state mi, Alagapp Subramanian leh Chelladurai Perumal-te chu kum li kalta khan hmeichhe pakhat thatah puh an ni. Qatar court-in thi tura an chungthu a relsak hnuah, External Affairs Minister Sushma Swaraj-i chuan, Qatar-a Indian palai hnen aṭangin an chungchang thu hi a zawtchiang a ni. Swaraj-i chuan embassy chuan zahngaihna lantir tura dilna siam tur hian Tamil Nadu sorkar puihna pawh a dil niin a sawi. 

Court chuan Indian Embassy-in mi pahnihte hnena thi tura hremna pek sut tura a ngenna chu a lo hnawlsak tawh a, mahse thiam loh chantir zing ami pakhat, Sivakumar Arasan hnena damchhung tang tura hremna a pek chu kum 15 atana a tihnep sak a ni. 

Tamil Nadu Congress MLA H Vasanthakumar chuan, Prime Minister Narendra Modi-a hnenah Subramanian leh Perumal-te chhanhim an nih theih nan hian inrawlh tura ngenin lehkha a thawn tawh a, Qatar thuneitute sawipui thuai turin Modi leh Swaraj-i te chu a ngen. PM hnena lehkha a thawnah, Vasanthakumar chuan Indian mi te hi chhuah a, India rama him taka thawnkir a nih loh chuan, Delhi-a Qatar embassy leh Mumbai-a Qatar Consulate-ah lungawi lohna lantir a tum thu a sawi. 

Tamil Chief Minister hlui, J Jayalalithaa-i khan Tamil mite chungchanga Qatar Supreme Court thutlukna appeal na tur hian cheng nuai 9.5 a lo sanction tawh bawk.


Share this Post

Login to comment
No Comments