HRI LENG, LOCKDOWN LEH DÂN
Covid-19 hrileng avangin ni 22, March, 2020-ah ‘Janata Curfew’ puan a ni a. Ni 24, March, 2020 khan India ram pumah ‘lockdown’ puan a ni a. He hrileng kaihhnawiha a hmalakna hrang hrangah te hian dan lam thil ṭhenkhat hriat leh ngaihtuah ṭul thil a awm nualin a lang. India ramah Covid-19 hrileng kaihhnawiha dantlawhchhan langsar zualte chu ‘Epidemic Diseases Act, 1897’ leh ‘Disaster Management Act, 2005’ te hi an ni.
Epidemic Diseases Act, 1897 hi dan tawi fel tak a ni a, chang li chauh a awm nghe nghe. Hrileng chungchangah State sawrkarte thuneihna a pe sang hle thung. Dan awm sate chu a duhkhawp lo a nih chuan hrileng laka invenna leh hmalakna kaihhnawihah he dan hnuaiah hian chutiang kawnga hmalakna atan chuan ‘mi tupawh a phut emaw thuneihna a pe (empower) thei ang a, chutiang thil atan chuan public notice hmangin temporary regulation a siam thei ang’ tiin thuneihna a pe a ni (Sec 2(1)).
He dan hian Central Sorkar thuneihna a pe meuh lo thung a ni. He dan hnuaia thupek bawhchhiate chu IPC chang 188-na anga hrem theih an nih thu a tarlang bawk.
Disaster Management Act, 2005 hi Central Sorkar chuan Covid-19 kaihhnawihah hian dan tlawhchhan atan rinrawla a neih a ni thung. He danhnuaiahhian National, State leh District level ah te thuneitu hrang hrangte leh an thuneihna te, mawhphurhnate tarlan niin chang 79 lai a awm thung. He dan hian dan dang emaw dan dang tlawhchhana thupekte nen inkalhna a neih chuan he dan hi a ding chang bawk a ni (Sec 72). India Danpui erawh he’ng dan chungah hian an awm reng a ni tih hriat tel a ṭul awm e.
Mizoram Sorkar chuan ‘The Mizoram Epidemic Diseases (Covid-19) Regulations, 2020’ chu ni 17, March, 2020 khan Official Gazette ah a tichhuak a. Hei hi ‘Epidemic Diseases Act, 1897’ chang 2, 3 leh 4 te tlawhchhana siam a nih thu tarlan a ni. He regulation chang 3-naah chuan he regulation hnuaia thuneihna pek hrang hrangte tarlan an ni a. Sorkar hnathawk hrang hrangte an ni hlawm. Chang thumna, pathumna têah chuan, ‘midang tupawh State Sorkarin Official Gazette ah notification chhuah’ a thuneihna a pekte an tel theih thu tarlan a ni bawk. He regulation ah hian Damdawi-In lam mawhphurhna te, hmun dang aṭanga lo hawte enkawl leh awm dan turte bakah hrileng kaihhnawih thuthang dik lo thehdarh chungchanga hremnate tarlan a ni deuh ber. He regulation hnuaia thuneitu, ‘authorized persons’ thuneihna a pek chungchang pawh dah hran ngaite bawhzui leh thuawih lote tihluihna hmanga dah hran chungchangte an ni deuh ber a. He dan bawhchhiate chu IPC chang 188 na anga hrem theih an nih thu tarlan a ni bawk.
Village/ Local Level Task Force…
Ni 19, March, 2020 khan Mizoram Sorkara Health and Family Welfare Secretary chuan notification a tichhuak a. He notification ah hian ni 17, March, 2020-a Health and Family Welfare Minister leh khawtlang hruaitute meeting-in a rel angin Village/ Local Level Task Force on Covid-19 chu din a nih thu tarlan a ni a.
Village/ Local Level Task force a tel turte chu - Chairman atan Village/Local Council President, Vice President atan President YMA/YLA/MTP/YCA te niin Member Secretary atan Village/Local Council Secretary te bakah member atan - Village/Local Council aṭangin mi 2, YMA/YLA/YTP/YCA Branch OB mi aiawh mi 2, President MUP/LUP ṭheuh, President MHIP, MChP/LWA/Chakma Mahila, Kohhran (Biak In ding chin) tin aṭangin mi 1 ṭheuh bakah Medical lam mi (Doctor/ Nurse/ Health Worker/ ASHA) te tel tur a ruahman a ni.
Ni 25, March, 2015 khan Disaster Management & Rehabilitation Department, Govt of Mizoram chuan‘ STANDARD OPERATING PROCEDURE (SOP) FOR VILLAGE/ LOCAL LEVEL TASK FORCE (COVID 19 Laka Mizoram Mipuite Himna Tura Village/Local Level Task Force Hnathawh Dan Kaihhruaina’ a tichhuak a. LLTF/VLTF te chu ‘The Mizoram Epidemic (COVID-19) Regulations 2019 regulation 3(3) hnuaiah pawh hetiang hi din phal a ni bawk’ tia tarlan a ni (para 1). ‘Standard Operating Procedure hi kaihhruaina a nih angin a dan emaw thupek anga ngaih tur a ni lo. Mumal tak leh awmze neia khua/veng tin te'n hma kan lak tlan theihna tura duan a ni’ tiin a inziak a. LLTF/VLTF te chu Mizoram Sorkarin Mizoram mipuite Covid-19 laka kan him theihna tura hma a lakna hrang hrangah kut ke pawimawh tak an nih thu a tarlang.(Lockdown puan hma deuha lo din tawh VLTF/LLTF te chu ring nghalin SOP-ah hian Lockdown kaihhnawih mawhphurhna a pe niin a lang)
Hetih lai hian LLTF/VLTF te chu ‘Mizoram Sawrkarin Covid-19 laka mipuite himna atana hma a lakna hrang hranga thawktu leh thuneitu pawimawh tak an ni’ (para 7) a ti bawk. Hemi kaihhnawihah hian LLTF/VLTF te mawhphurhna hrang hrang tarlan a ni a. Lockdown laia sorkar thuchhuak mipuite'n thuawih taka an zawm theihna atana hmalak te, hemi kaihhnawihah hi an ei leh bar mipui mamawh khaihlak lova a kalna atana hmalak chungchangte bakah Covid-19 laka mipui himna tura sawrkar thuchhuahte a hlawhtlin theihna atan mahni veng ṭheuha hmalakte bakah hemi kaihhnawih thil ṭhenkhat dang pawh a tel a ni.
Lockdown lehdan tlawhchhan chu?
Ni 24, March, 2020 khan National Disaster Management Authority chuan Disaster Management Act, 2005 Chang 6(2)(i) tlawhchhanin hrileng kaihhnawiha sorkar laipui leh state te zawm tur thuchhuak a siam a. He thupek bawhzuina leh Disaster Management Act, 2005 Chang 10(2)(1) tlawhchhanin Union Home Secretary chuan Chairperson, National Executive Committee a nihna angin thuchhuah a siam leh ta a ni. Hei hi ‘Lockdown’ tia kan sawi chungchanga dan tlawhchhana a lo irhchhuah dan chu a ni.
Ni 25, March, 2020 ah chuan Chairperson, State Executive Committee, State Disaster Management Authority (Chief Secretary, Govt of Mizoram nibawk) chuan Disaster Management Act, 2005 chang 22(2)(h) tlawhchhanin a chunga tarlan sorkar laipui lam thuchhuak bawhzuiin ‘Lockdown’ chungchang thuchhuah a siam zui ta bawk a ni.
April ni 14, 2020 khan Union Home Secretary chuan he dan tlawhchhan bawk hian lockdown chu May ni 3 thleng Prime Minister (Chairperson, National Disaster Management Authority) ni bawkin a thusawia a tarlan hnuah dan anga thuchhuah siam a nih thu a tarlang leh bawk. A tir aṭanga vawiin thleng hian lockdown chhunga thil hrang hrang kalpui dan tur thuchhuak hrang hrang tihdanglam pawh a awm chho ta nual a ni.
April ni 15, 2020 khan Sorkar laipuia Ministry of Home Affairs chuan ‘Lockdown’ chungchanga thuchhuak thar ‘Consolidated Revised Guidelines on the measures to be taken by Ministries/ Departments of Govt of India, State/UT Govts and State/UT Govt authorities for containment of Covid-19 in the country’ chu a tichhuak a. Hemi behchhan leh a bawhzuina atan hian Chief secretary Pu Lalnunmawia Chuaungo chuan Chairman, State Executive Committee, State Disaster Management Committee chuan lockdown chungchanga thuchhuah thar, ‘Revised Guidelines for the Containment of Covid-19’ a siam nghal bawk a, hei hi https://dipr.mizoram.gov.in/ah ni 18, April, 2020 khan tarlan a ni.
Mah se…
Village/Local Level Task force te kan nei hi kan vannei hle a, hetiang taka tun ang hrileng kara ṭangkai leh mi inpete hi neih ve tumin hnam dangte hian han bei se an harsat hlein a rinawm hial a ni. Sorkar pawhin hetiang din nachang a hria hi a remhre ngawt mai. Chutih rual chuan, sawi tawh angin dan lam thlirna aṭanga thil thlir tur kan nih avangin ngaihtuah ngai awm ta chu Village/ Local Level Task Force te din dan leh thuneihna chungchang khaihhnawih hi a ni.
A chung lama tarlan tak angin Standard Operating Procedure (SOP) Sawrkarin a siamah khian thil ṭhenkhat inkalh thei deuh a awmin a lang a. SOP hi ‘inkaihhruaina’ a nih thu leh ‘dan emaw thupek’ anga ngaih tur a nih loh thu tarlan a nih laiin Village/Local Level Task Force chu hrileng laka kan himna atana ‘thawktu leh thuneitu’ pawimawh tak tih a ni a. Eng chin ‘thuneihna’ nge a neih tih hi ngaihtuahzui tham tak a ni.
SOP-ah vek hian Village/Local Level Task Force chu ‘The Mizoram Epidemic (COVID-19) Regulations 2020 regulation 3(3)' hnuaiah din phal a nih thu tarlan a ni a. Ni 19, March, 2020 a Mizoram Sorkara Health and Family Welfare Secretary notification a tihchhuahah chuan Village/ Local Level Task Force chu eng dan tlawhchhana din chiah nge tih a lang lo thung a, SOP a tarlan hi a rin zui theih mai awm e. Mizoram sawrkar regulation siam khi kan en chuan regulation-in regulation kengkawh tura thuneihna a pek, ‘Authorized persons to act under these Regulations’ tia a tarlansa bak mi dang thuneihna pek a nih dawn chuan ‘Sorkar Official Gazette-ah notice chhuah tur’ a nih thu tarlan a ni a. Regulation 3(3). Village/Local Level Task Force te hi dan angin he regulation kengkawh tura thuneihna a pek zingah a tel em tih hi Official Gazette a chhuah a nih leh nih loh hian a hril theih a rinawm bawk.
A dawt lehah chuan Covid-19 hrileng laka invenna leh a kaihhnawih atana dan tlawhchhan tam ber hi Epidemic Diseases Act 1897 ni lovin Disaster Management Act, 2005 zawk hi a ni si a. Village/Local Level Task Force a dinna hi ‘The Mizoram Epidemic (COVID-19) Regulations 2020 regulation 3(3) behchhan a nih chuan he regulation kengkawh tura thuneihna nei, ‘Authorized Persons to act under thes regulations’ ah an tel thei ang em? Disaster Management Act, 2005 behchhana thuchhuah siamte hi keng kawh turin dan mit aṭanga thuneihna nei thei a ni reng em tih pawh hi ngaihtuah tham tak a tling awm e.