COVID-19 AIA HLAUHAWM COVET-20
The Epoch Time chanchinbuin a tarlan danin Covid-19 hi December 1, 2019 aṭanga inṭan tawh kha a ni a, Dec. 10 khan case 3 hmuh niin a tarlang. China Sorkar erawh chuan Dec. 8, 2019 vel aṭanga Wuhan Hubei Province, China aṭanga inṭan niin a sawi thung. A natna hming COVID-19 hi February 10, 2020-a phuah chauh kha a ni. Miin a kai aṭangin ni 2-7 chhung leh ni 14 thlengin a hriat theih nia sawi a ni. He natna kai tho si, symtom lang vak lo pawh a awm theih nia sawi a ni. A tirah chuan khuh, khawsik leh thãwk harsatna a thlen ṭhin. Hripui hlauhawm tak Covid-19-hian khawvel ram 210 a tuam mêk a ni.
Hetih lai hian COVID-19 aia hlauhawm Mizo Kristiante zingah COVET-20 a lo inlar ṭan leh mek thung a. Chuvangin, he Covet-20 hlauhawm danglam tak lo chhuahna hi kimchang deuhin i han chhui lawk teh ang.
Covet-20 hi Grik ṭawng chuan Aplistia an ti a, latin ṭawng chuan Concupisco tih a ni. Sapṭawng chuan covet tih a ni a, Mizo ṭawng chuan it/ awt/ duham tihna a ni. Covet-20 tih a nih chhan hi March 22, 2020 aṭanga Mizoram bikah a lo inlãr nawn leh tãk vang chauh a ni. A lo chhuah ṭanna hmunpui ber (Epi-Centre) chu Mesopotamia-a Euphrates lui leh Tigris luikam tuak phaizawl niin tuna Iraq awmna khu a ni. A hma chuan helai hmun hi Eden Huan tih a ni.
Covet-20 rawn thlentu chu bãk (bat) ni ve lovin, serpent Rul a ni tih Damascus Healing Centre-a Head of Department Scientist Dr. St. Paul (Tirh 9:3) chuan a sawi. A sawi danin Covet-20 hi a tirah chuan hmeichhe pakhatin Rul (Serpent) aṭangin a kai ṭan a; a pasal a kãi chhawng leh a, chuta ṭang chuan khawvel pumah a lo ṭãi darh chho ta a, Covid-19 aiin a ṭai darh nasa zawk fe niin a sawi.
A sawi zel danin hei hi COVID-19 ang bawkin natna hrik boruaka leng (airborne disease) ni lovin moral chi khat neurobiology-in a rawn hrin chhuah a nih thu 30AD khan a lo sawi daih tawh a ni. (Rom 5:12)
Israeli Researcher-te chhut dan phei chuan covet-20 hi kum 209,000 kal ta aṭang khan mi 2 Adama & Evi-te'n an lo vei tawh niin an tarlang. Theologian-te erawh chuan 4000BC khan a inṭan niin an sawi. (Gen. 2:7f; 3;1f). Hei tho hi Dr. St. Paula sawi hi a ni.
Heti taka moral khawih chhe thei natna upa tawh a nih avang hian fimkhur a ngai hle a, chuvangin, a lanchhuah dan (symtom) leh inven dante tarlang ila a ṭha awm e.
A lan chhuah
dan (Symtom)
He natna hi mihring taksaah a lang chhuak ve lova, a veite pawh hrisel sen thau mum kãngin an awm thei a; HIV+ve vei ang maiin a ruka vei theih reng a ni. Covid-19 angin khawsik, khuh ro, hrawk thip leh fatigue a siam ve lova, hetia en ringawt chuan dam ṭha pangngai ang mai an ni ṭhin. Mahse, a vei mektea a lan chhuah dan Dr. St. Paul-a'n a sawi chu hetiang hi a ni.
1. Inngaihna
2. Bawlhhlawhna
3. Hurna
4. Milem biakna
5. dawithiamna
6. Huatna
7. Inhauna
8. Thikna
9. Thinurna
10. Inkhinna
11. Awm hranna
12. Rin hranna
13. Sum ngainatna
14. Duhamna
15. Bum hmang
16. Hmangaihna pianpui nei lo
17. Kut tling lova hausakna
18. Kawhmawhbawlna.
Covet-20 hi Mizo Kristiante zingah vei an tam bik niin a hriat theih a, positive case an awm nual tawh bawk nia sawi a awm.
Mizorama Covet-20 symtom lang tam ber chu no. 12 - 18-nate khi niin theologian-te chuan an sawi. Mipuiin hun harsa kan dãi apiangin heng symtom no. 12-18-te khi an lo inlãr ziah ṭhin a, hetiang veite laka hri kai lohna tura invenna ṭha ber chu social distancing tho a ni a, mahse, covid-19 aiin inkãichhãwn a awlsam zawk avangin anmahni hlat theih tawpa awmin a him theih chauh thung.
Chutiang a nih loh vek pawhin anmahni ngheng rengin awm mah ila an moral virus ang kha kai lo tura inthunun (self control) a ngai a, dikna leh takna, rinawmna nen mi a inven tlat chuan he virus hi a kai theih loh thung. Face mask hman a ngai ve lova, kutsil (hand washing) erawh ngaih pawimawh hle a ngai thung. Mahse, hand washing pangngai chauh ni lovin thinlung thianghlim (holy heart/secred heart) a pawimawh ber zawk a ni. (Sam 24:4; 73:13; Jakoba 4:8; Job 17:9; Mat. 15:20 cf Galatia 5:19-21).
Case hmuhchhuahte
Khaw pakhata nu pakhatah covet-20 kãi hmuh chhuah a ni a, a natnain a nghawng dãn symtom lo lang chu - anmahni panhnah thar ngei 1 kg Rs. 250/-300/- a hralh ṭhin chu lockdown a nih veleh 1 kg Rs. 700 - 800 in a hralh char char nia hriat a ni. He damlo hian symtom no. 12 & 13 virus khi a kai nasa bik a ni tih laboratory aṭanga confirmed niin an sawi.
Aizawl veng pakhata vei mek nu pakhat pawhin covet-20 a kai a, a symtom lanchhuah dan chu maian tel 1 Rs 30-50-a hralh ṭhin chu lockdown hnuah tel 1 Rs. 120/- in a hralh char char nia hriat a ni; hei pawh hian symtom no. 12, 13&15, 16 te a kai nasa hle niin laboratory lam case report-ah a lang.
Buhfai, sã leh dãwr thil (essential commodities) zuartu Mizorama dãwrkai engemaw zãtte chuan tun hma aṭangin covet-20 virus hi an kai ṭhin a, tunah pawh an kãi darh mek a, lockdown hmaa thil rate pangngaia lei tur bungrua a vang ta hle niin kan report dawnna chuan a tarlang.
Hetih lai hian mifel leh rinawm, dik taka tlawmngaihna leh hmangaihna dik tak nena sumdawng covet-20 virus-in a tih buai ve theih loh mirethei zawkte ṭanpui ṭhin engemaw zãt an awm ve bawk.
Vairam lam state hrang hranga Mizo awmte ka biakna aṭanga report ka dawn dan chuan Janta curfew March 22, 2020 aṭanga tun thlengin Vaiho zingah Covet-20 kai an la awm ve meuh lova thil rate pawh a la pangngai reng a ni.
Mizoramah ramri vengtu ṭhenkhat phei chuan covet-20 veite avang hian nitin mamawh dawr thil to tak takin an lei a ngaih phah a, an harsat zual phah hle tih hriat a ni. Mirethei zualte tan phei chuan dam khaw chhuah a har hle dawn niin mi thil chik mite chuan an ngai.
A damdawi
Covet-20 veite enkawl dam nan hian nachhãwkna anga lo hman lailawk theih Complementary Medicines ṭha tak tak a awm a, mahse, covid-19 enkawlna atana hman mek Hydroxychloroquine chu hman a ngai ve lo thung. Enkawl nana damdawi ṭhate chu hengte hi an ni: AMC, DM&R, SLTF, DLTF, LLTF/VLTF.
A tirah chuan heng damdawi hmang hian covet-20 vei lo tura fimkhur turin social media hmangin mipuite hi hriattir leh ngen an ni a, mahse, covet-20 vei tate hi heng damdawi hian a tak taka a luhchhuaha a chhut hlum leh si loh avangin thil man hian to lam a pan chho zel niin a lang.
Heng damdawite hian EC Act 1955 & Act no 10 of ,1955 angin a thawh tur dik tak virus kaiteah hian thawk se chuan vairam ang bawkin thil rate hi a pangngai reng a la ni ngei ang. Mahse, a thawh dan hi nachhãwkna atan chauha hman chi an nih hmel ta ber a, covet-20 virus chhu hlum thei tura ngaih a nih laia a thawh tur a thawk ta si lo hi Zoram kristiante zingah a darh ta chiam niin a lang. Nakin lawkah phei chuan Covet-20 hi a darh chak hle dawn nia ngaih theih a ni. Hetih rual hian lockdown hlih hnuah pawh thil man tih to zui reng hi an tum zel mai awm mang e tih chu rin lãwk theih a ni bawk. Chuvangin, Zoram sorkar, ministry chak tak hian khing covet-20 damdawite khi price controlling khawih teltir vat se, chak taka thawk turin thu pe se, he virus hi an um bo thei mai dawn niin theologian-te chuan an ngai.
A dam hlenna damdawi
COVID-19 ang lo takin covet-20 hi chuan taksa thihna (physical death) bakah thlarau thihna spiritual death nen lam a thlen thei a, hei vang tak hian covid-19 aiin a hlauhawm lehzual a ni. (Luka 12:4, 5)
Hetiang a nih avang hian a damdawi ṭha ber Divine Healing Centre-neitupa fapa mal neih chhun (begotten son), mirethei leh chhumchhiate tidam a, bengngawng, kebai, zeng, piangsual, phãr leh ramhuaite hnawt chhuak a, mitthite kaithova thihna hneha tholeh ta topmost supper specialist Lal Isua chuan covet-20 damdawi
ṭha ber chi, a dam hlenna damdawi a nei a, a thlãwnin a mamawhtute chu a pe reng thei a ni. Chu damdawi chu Grik ṭawng chuan Anagenao a ni a, sapṭawng chuan rebirth emaw borne again an ti; Mizoṭawng chuan piangthar/ piang nawn tihna a ni. (Johan 3:3ff).
He damdawi hi a course dik taka ei apiangte chuan damna tluantling an chang zel a; simna tel lo piantharna an chan ve ngai loh avangin covet-20 virus hian a tibuai ve tawh ngai lo. Khawi hmunah pawh awm se, takna leh dikna nen hmangaihna leh rinawmna nen mite tan an nun an pe tawh zawk ṭhin a ni.
Chuvangin, he Covet-20 (duhãmna sual) virus hi kai lo turin inbuatsaih ila. He hri kai mekte pawh hian Anagenao-1000 mg capsule Lal Isua hi a hun takah neiin inenkawl se Zoram a dam leh ang a, chatuan nunna an nei thei dawn a ni. (Joh 15:13; Luka 9:24).