Europe-a footballer hlu ber Mbappe

Football khawvela player, coach leh team-te hlut zawng zirchiang ṭhintu CIES Football Observatory chuan European football-a league langsar zual panga Premier League, La Liga, Serie A, Bundesliga leh Ligue 1 player-te hlutna a zirchiang a, Kylian Mbappe chu footballer hlu berah an thlang.

CIES zirchianna aṭanga a lan danin French striker hlut zawng hi pound maktaduai 230.5 a tling a, amah hnaih bertu Raheem Sterling aiin a hlutna hi pound maktaduai 57.5 zetin a tam zawk - Sterling hi pound maktaduai 173-a hluah ngaih a ni. 

Kum 35 mi Cristiano Ronaldo-a'n chuai lam a pan ve ta tih chiang takin a lang a, 70-naah a lang pha ṭawk. Juventus forward hlutna hi pound maktaduai 55.86-ah tehsak a ni. 

Barcelona thiampuipa Lionel Messi chu top 25-ah lang phakin 22-na a ni a, Argentine forward hlut zawng hi pound maktaduai 89 angin an chhut. 

Player-te hlutna hi an khelh ṭhat dan aṭanga teh a ni ngawt lo a, tehna hrang hrang tam tak hman a ni. Player-ten season an hman ṭhat leh ṭhat loh hi tehna bulpui ber chu a ni ngei a, an season hman danin an hlutna hi thui takin a hril. 

Hei mai hi a ni lo - player contract rei zawng chu tehna atan hman a ni leh a, an kum zatin thui takin an hlutna a hril bawk. Khawvel huapa player-ten hriat an hlawh dan te, an career-ah hma an sawn zel em tih te chu tehna dang a ni. 

Mbappe hlutna san chhan hi a kum la naupan vang a ni ber a, kum 21 chauh a la ni. Hei mai a ni lo, a club khelh mekna Paris Saint-Germain-ah hian kum 2023 thleng contract a nei bawk a, PSG tan season duhawm tak a hmang bawk. 

An tehna aṭanga thlir chuan Mbappe-a'n pakhatna dinhmun a luah hi a awm ngawih ngawih angin a sawi theih a, player naupang lam hlutna a sang viau hi thil mak a ni hran lo. 

Eng thil pawh ni se, football kaihhnawih a nih tawh chuan khawvelin Lionel Messi leh Cristiano Ronaldo lam a hawi vat ṭhin a, tuna CIES zirchiannaah pawh hian player pahnih hlutna hriat châk an tam hle. 

Kum 32 mi lai ni tawh chunga Messi-a'n 25-na dinhmun hial a la luah thei hi chu fak tlak a ni a, Barcelona-ah kum 2021 thleng bak contract a nei tawh lo tih ngaihtuah tel phei chuan a hlutna vawrh sangtu hi khelmuala a khelh dan tih chiang takin a lang thei. 

Messi hian tun season-ah inelna hrang hranga match 31 khelin goal 24 a khung leh der tawh a, top 25-a lang phak zinga Messi kum ang zat hnaih ber chu Antoine Griezmann a ni. French forward hi kum 29 mi niin pariatnaah a lang. 

Kum 35 mi a nih tawh avangin Ronaldo-a'n 70-na dinhmun a luah pha ṭawk hi thil awm lo a ni hran lo a, Juventus-a a contract hi kum 2022 thleng chauh a ni bawk. 

Three Lions ṭantute tan chuan tun ṭum CIES zirchianna hi lawmna tur hlir a ni - top five-a player lang zingah hian Mbappe tih loh zawng chu English player vek an ni a, England national team hmabak a êng tihna a ni tel bawk. 

Mbappe hnuaiah Sterling a awm a, pathumna chu Borussia Dortmund forward Jadon Sancho niin a hlutna hi pound maktaduai 159-ah chhut a ni. Kum 20 mi Sancho hian German club-ah kum 2022 thleng cham turin contract a nei. 

Liverpool defender Trent Alexander-Arnold chuan palina dinhmun a hauh a, a hlutna hi pound maktaduai 152-ah chhut a ni. Arnold hi kum 21 mi chauh a la ni a, Anfield-ah kum 2024 thleng cham turin contract a nei bawk. 

Manchester United chhuanvawr Marcus Rashford chu pangana a ni a, a hlut zawng hi pound maktaduai 136 a tling. Rashford hian United tana 2024 thleng khel turin contract a la nei a, kum 22 mi a ni. 

February thla khan Switzerland-a hmunpui nei CIES hian Liverpool chu European football-a squad nei hlu ber an nih thu an lo sawi tawh a, Reds squad pumpui hlutna hi pound tluklehdingawn 1.27-ah chhutsak an ni. 

Player-te hlutna tih-chhuahah pawh hian top 25 china player thawh hnem ber chu Liverpool an ni a, Premier League champion hmabak team hian player panga ngawt an thawh. 

Arnold bakah hian  Mohamed Salah, Sadio Mane, Roberto Firmino leh Virgil van Dijk chu Liverpool player lang an ni a, squad pumpui hlutna lama Reds hnuai chiaha lo awm tawh City chu player thawh hnem pahnihna niin Liverpool hnuaiah bawk an awm.

City hian Sterling bakah hian Bernardo Silva, Gabriel Jesus leh Rodri an thawh. Barcelona chuan player pathum thawhin Messi leh Griezmann bakah Frenkie de Jong an thawh a, Real Madrid chuan top 25-ah player thawh an nei miah lo!