Rpa Ralte leh Hlimhlimi-te'n Krismas hla zaninah an tichhuak dawn

'Tu dang kan ngai tawh lo'ng' hitmaker Rpa Ralte leh 'Ṭhian rinawm' hitmaker Hlimhlimite chuan zanin hian Krismas hla 'Lalber Thar (Ngai ru)' an tichhuak dawn.

'Lalber Thar (Ngai ru)' hi Rpa Ralte tan chuan a Krismas hla pahnihna tur a ni dawn a, ama phuah ni bawkin Hlimhlimi hian a hla phuahnaah hian a pui a ni. Kum 2016 khan Rpa hian 'Angelte Zai Ri' a lo tichhuak tawh a, khami kha ngainatute tan kha chuan 'Lalber Thar' pawh hi nghah-hlelhawm tak tur a ni ngei ang.

Hlimhlimi nen hian hla siam dun an chakna a rei tawh hle tih Rpa chuan sawiin mahnia solo project an neih ve ve avangin an thawkdun lawk thei lo a, Rpa hian a hla phuah dang pawh Hlimhlimi hi saktir lo tum tawhin chu pawh chu Lockdown vangin an puitlin hleithei lo a, Krismas hla 'Lalber Thar (Ngai ru)' erawh kumtawp dawn aruaiah an puitlin thei hram tih Rpa chuan a sawi a ni.

'Lalber Thar (Ngai ru)' hi pop music, up beat deuh a ni dawn a, lam rem tak a ni dawn a nih hmel. Cletic music lam rawng a kai deuh dawn bawk a, violin rimawi tak tak hriat tur a awm dawn bakah recording-ah acoustic instrument an hmang niin hla phuahtu Rpa chuan a sawi a ni.

Mizo guitarist ṭha ber pawl Ephraim-a guitar perh ngaihthlak tur a awm dawn bawk a, beng a fah hle ang tih a rin thiam theih.

Hla phuahtu Rpa chuan a thawhpui Hlimhlimi chu thawhpui nuam a tih thu sawi bawkin a zaithiam piah lamah hla phuah lamah pawh talent a nei ṭha hle a ni, tia sawiin kan hla thar turah pawh hian contribution a nei ṭha hle, a ti.

Music video-ah hian Hlimhlimi lam hi hmuh tur a awm dawn a nih hmel a, chu chuan music video a tihmuhnawm zual hle niin a sawi a ni.