Inkhàrkhip khauh zawkin kalpui ṭan Khawlaia chhuakvâk an tlem phah
June 9, Thawhṭanni zanlai aṭangin Aizawl Municipal Corporation (AMC) area, district headquarter 11 leh DC-te'n an huam chhunga quarantine centre leh Covid-19 vei enkawlna hmun leh a chhehvel (containment area) an puanahte khauh zawkin inkhàrkhip kalpui a ni a, hei vang hian khawlaia lirthei leh kea veivâk an tlem phah.
Nimina Vanglaini palaiin AMC area a fan kualnaahte chuan, inkhàrkhip khauh zawka kalpui a nih hma nena khaikhinin lirthei leh kea veivâk an tlem phah hle. Hmun hrang hrangah traffic leh police-te an duty a, phalna neia chhuak an nih leh nih loh an lo enfiah ṭhin.
Police duty-te chuan, phalna nei loa chhuak an awm meuh loh thu an sawi a; chutih rualin, khaw hmáwr lamah chuan inkharkhip khauh zawk kalpui a nih hmaa an khaw lama haw hman lo, mahni khaw lama haw tur an tam thu an sawi a ni.
Hetih lai hian, mimal lirtheia medical duty tih leh 'On Duty Covid-19' tih intár hmuh tur an awm nual a, lirthei tam taka an tàrah chuan an department hotute emaw, an department seal inchhu emaw hmuh tur a awm lo.
Inkhàrkhip khauh zawka kalpuina hmunah hian ni tin mamawh zawrhna dawr, mihring leh ran damdawi dawr, thlai chi leh leiṭha zawrhna dawr, kut hnathawktute mamawh zawrhna, ran chaw zawrhna, oil leh motor part zawrhna dawrte chu DC leh local task force-te ruahman angin hawn theih a ni a; mahse, dawr inhawng erawh an tlem hle.
Khauh zawka inkharkhip kalpui a nih leh hma - Lockdown 5.0-ah chuan zing dar 4:30 leh zan dar 7:30 inkarah a duh apiang an chhuak thei a; tuna Lockdown 6.0-ah erawh chuan AMC area, district khawpui 11 leh containment area-ah phalna nei lo tan chhuah phal a ni lo.
AMC, district khawpui 11 leh containment area ni lo, khaw dang zawng chuan zan lam (zan dar 7:30 - zing dar 4:30 inkar)-ah curfew a nih avangin chhuah phal a ni lo a, khaw èn lai zing dar 4:30 aṭanga zan dar 7:30 inkarah erawh chuan phalna lak kher ngai loin chhuah theih a ni. Hna thawh theih a ni a, dawrte pawh a pangngaiin hawn theih a ni. Sorkar pisate pawh dan pangngai (full strength)-a kal tur a ni bawk.