Sorkar puh chhiatna tur zawngah ZPM puh

MNF party chuan thuchhuah siamin, AMC inthlan tura free symbol zingah lukhumparh a telh loh thu an tarlang a; symbol chungchangah hian ZPM party chu sorkar puh chhiatna tur zawngah an puh.

MNF chuan, AMC inthlan awm turah ZPM-in election symbol atana an duh thlan lukhumparh chu free symbol zinga a tel loh avangin sorkarin hman a phal lo angin an tarlang niin an sawi a, "ZPM hian election symbol chungchangah state sorkarin thuneihna a neih lohzia leh Election Commission thuneihna a nih dan an hre lo nge, hre reng chungin sorkar puh chhiatna a zawng tih ngaihtuah tham tak a ni," an ti.

Mizorama political party dangte'n inthlan apiangin symbol nghet an neih laiin, ZPM chu inthlan dawn apiangin symbol thlak ngaiin an awm nia sawiin MNF chuan, "Hei hian ZPM-in dinna nghet a neih lohzia a tichiang hle. ZPM hian eng symbol pawh hmang se, tlin phah nan emaw, sorkar phah nan emaw an hmang chuang lo," an ti. AMC inthlan turah pawh dâwt hmanga mipui bum tuma bul ṭanah leh sorkar tihhmingchhiat tumah ZPM an puh a ni.

MNF tarlan danin, The Mizoram Municipalities (Election of Councillors) Rules, 2007 section 39 angin, Election Commission of India pawmpui (registered) party-te'n reserved symbol an hmang thei a; MNF, Congress, MPC leh ZNP-te chu ECI recognised party an nih avangin an party symbol an hmang thei. Unrecognised party-te'n free symbol an thlang thei thung.

Rule 39(2)-a a lan danin, reserved symbol 12 a awm a, free symbol hman theih 30 a awm. Free symbol zingah ZPM-in AMC inthlana symbol atana an duh lukhumparh a tel loh avangin an hmang thei lo niin MNF chuan an tarlang.