Lalduhoma tan ṭawngṭai turin ZPM-in ngen

Zoram People's Movement (ZPM) party chuan nimin khan thuchhuah siamin, ZPM Legislature Party (ZLP) leader Lalduhoma tana ṭawngṭai turin Mizoram mipui an sáwm a; Lalduhoma chungchanga Assembly Speaker thutlukna azirin an kal zel dan tur an puang dawn tih an tarlang.

ZPM party chuan, Lalduhoma hekna chungchanga Assembly speaker Lalrinliana Sailo-in a thutlukna vawiina a puan turah ṭawngṭaipui turin Mizoram mipui an ngen a, "Pu Lalduhoma hi bial pahnih, Serchhip leh Aizawl West-I bial mipuite'n duh taka an thlan tlin a ni. Dik lo taka MNF MLA 12-te'n an hêkna hi tihpuitlin a nih lohna tur leh, a hun (term) a hman tluan ngei theih nan rorelna dik tak Speaker-in a siam theih nan mahni remchan dan anga Pathian hnena ṭawngṭaina lo hmang turin kan ngen a ni," an ti.