US President Election : Vote chhiar chhunzawm zel

US President thlannaa vote tlate chu chhiar chhunzawm mek a la ni a, result kimchang a la chhuak thei lo. 

Final result tihchhuah la ni thei lo mah se, Democratic Party presidential candidate Joe Biden chu tling tura ngaih a ni tawh thung. Joe Biden hian result puan tawh zingah electoral college vote 538 aṭangin vote 264 a hmu tawh a, tling turin vote 270  hmuh a ngai a ni. Result la puan lohna state panga zinga pakhatah chauh pawh a chak chuan a tling thei tawh dawn a ni.  President ṭanglai, Republican Party presidential candidate Donald Trump chuan vote 214 a hmu thung a, chak tur chuan state paliah a chak ngei ngei a ngai thung. 

Biden chuan reporter-te a kawmnaah hnehna a chan thu a la puang dawn rih loh tih sawiin, mahse President tling tura vote hmuh ngai zat erawh a hmuh tlin ngei a ring tih a sawi. 

US Election Project-in a tarlan danin, kumin US President thlanna hi kum 120 chhunga inthlana vote a tlak ṭhat ber ṭum niin, vote tla hi 66.9% a tling. 

Kum danga inthlan aiin kuminah kum naupang lam, kum 18-29 inkar  (young voter) vote thlak an tam a, heng mite vote hian awmzia pawh a nei thui dawn hle a ni.

Young voter zingah Joe Biden thlawptu an tam zawk. AP VoteCast data aṭanga a lan danin, young voter zingah Biden vote-tu 62% an awm laiin,  Trump vote chu 33% chauh an awm. 

Young voter mingo mipa zingah Trump thlawptu chu Biden thlawptu aiin 6% in an tam a, hetih lai hian young voter mingo hmeichhia zingah Biden thlawptu hi 55% an nih laiin Trump thlawptu chu 42% an ni thung a ni. 

President thlannaa vote tla chhiar tawh zingah Joe Biden chuan maktaduai 72 chuang hmu tawhin, presidential candidate ni tawh zingah vote hmu hnem ber a ni tawh. Trump chuan vote maktaduai 68 a hmu tawh bawk a, kum 2016 inthlan aiin maktaduai liin a hmu tam tawh zawk bawk. 

Inthlan result kimchang a la hriat loh chungin khawpui ṭhenkhata nawrh huaihawtin buaina a chhuak. 

Buaina chhuak tam zawk hi Black Lives Matter leh Shutdown DC ho kaihhruai an ni. Washington, New York City, Chicago, Los Angeles, Seattle and Portland, Ore bakah Philadephia leh Minneapolis-ahte buaina hi a chhuak a ni. 

Portland-ah chuan buaina chhuak vang hian National Guard duty tir an ni a, nawrh huaihawt zinga mi 11 man an ni tawh. New York police-te pawhin buaina siam mi 50 an man bawk. 

President Donald Trump cam­paign chuan final result tihchhuah la ni lo mah Wisconsin, Georgia, Pennsylvania leh Michigan state-a vote tlate chhiar ṭhat an phut. 

Wisconsin-ah hian Biden a chak dawn niin US media te chuan an tarlang a, mahse final result tihchhuah la ni lo a, Pennsylvania result pawh hriat a la ni lo. Heng state-ah hian Biden hi a chak chuan President atan a tling thei tawh dawn a ni. 

Kum 2016 inthlanah khan Wisconsion-ah hian khan third party presidential candidate Jill Stein ngenna angin vote chhiar ṭhat a lo ni tawh bawk a, mahse a result erawh a danglam chuang lo a ni. 

Donald Trump hi a chak zo lo a nih chuan kum 1992 hnua US President thlannaa President ṭanglai candidate zinga chak lo hmasa ber a ni ang.  

Hetih lai hian Trump hi President ṭanglai zingah inthlana chak lo awmchhun a ni dawn lo thung. Kum 100 chhungin President term hnihna chelh tuma chak zo lo hi mi pali an awm. 

Kum 1992 khan Republican George HW Bush chuan a term hnihna atan President hi chuh lehin, Bill Clinton a hneh zo lo. 1980 khan Democrat Jimmy Carter chaun Ronald Reagan a hneh lo a, 1976-ah Republican Gerald Ford chuan Jimmy Carter hneh loin, kum 1932 khan Republican Herbert Hoover chuan Franklin D Roosevelt a lo hneh zo tawh lo bawk a ni. 

President Donald Trump-a'n Paris Climate Agreement aṭangin US a inhnuhdawh tur thu nikum kha a sawi lawk hnuah, Nilaini khan official-in US chuan he inremna siam hi a chhuahsan ta. 

Hetih hian Joe Biden chuan President atana thlan tlin a nih chuan Paris Accord hi US in a zawm leh nghal dawn tih sawiin, "Trump kaihhruai sorkarin Paris Climate Agreement hi chhuahsan mah se, Biden kaihhruai sorkar chuan ni 77 hnuah a zawm leh nghal dawn a ni," tiin nakkum January 20-a President thar lakluh a nih hun tur a sawi. Hemi rual hian he Accord-a tel leh tur chuan Biden hian official in UN  hnenah a hriattir ve leh phawt a ngai dawn a ni. 

an United States Senate-a seat 100 zinga seat 35 leh, House of Representative-a seat awm zawng zawng, seat 435-ah inthlan neih a ni nghal a, hei bakah hian state leh territory 13 governor thar tur thlan a ni bawk. 

Kum 2018 aṭang khan Democrats lam hian House of Representative-ah majority neiin seat 232 a nei a ni. Senate hi kum 2014 aṭangin Republican thunun a ni thung a, seat 53 a nei a ni. 

Senate leh House of Representative inthlan result kimchang hi hriat a la ni lo. House-ah hian result hriat tawh chinah Democratic Party-in seat 204 a la tawh a, Republican Party in seat 190 a la tawh. Senate-ah hian Republican lamin member 48 nei tawhin, Democrats lamin member 46 a nei tawh bawk. 

Senate seat 35-a inthlan neihna hi Republican seat chelh lai 23 leh Democrat 12 te an ni.