KHAWTHLIR

Kolasib bawrhsap Dr H Lalthangliana chu nimin khan MJA, Kolasib district member-te'n an kâwm a; Mizoram leh Assam ramria buaina vanga lirthei tangkhang te, ni tin mamawhtea Mizoram dinhmun leh sorkar hmalak dan an sawipui a, ramria harsatna avangin mi dang ngaichâng chunga khawsak tum tur leh mamawh bâk lei/chhêk khawl lo turin mipui a ngen.

Nimin khan Sinlung Hills Council (SHC) huam chhunga khaw parukah Hmar People's Convention (HPC) president tur thlan a ni a, Rohringa s/o Chhunga (L), Khatla, Aizawl thlan tlin a ni.HPC president thlanna atan hian zing dar 9 aṭanga chhun 12 chhungin polling booth paruk - Sakawrdai, Ratu, Zohmun, Suangpuilawn, Khawlian leh Saiphai­ahte vote thlak a ni a; voter 302 zinga 288 (95.37%)-in vote an thlak. 

State Referral Hospital-ah Covid-19 vei mi 72 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, mi 72 zinga panga chu ICU-ah enkawl an ni a, mi dang zawng Isolation Ward-ah an awm. ICU-a awm zinga pathum chu ventilator nena enkawl an ni a, mi dang pahnih pawh oxygen pek mek an ni. Ward-a awmte zingah ngaihtuahawm an awm lo. SRH-a awm zingah hian kum 60 chung lam mi 21 leh kum 14 hnuai lam pali an tel a ni.

YMA, Central Executive Committee (CEC) hruaitute chu nimin khan Central YMA Committee Room-ah an ṭhu a, Mizoram-Assam ramri buai vanga Mizoramin harsatna a tawh mek an sawiho. CYMA chuan, Mizoram china Mizo police venhim hna thawk mekte chu hnûkkîr lo a, an awmna hmunah awmtir zel tura hma la turin sorkar an phût. Ramria buaina vanga harsatna thleng hrang hrangah YMA sub-headquarters, group leh branch-te hmalaknaah lawmthu sawiin, "Mizo hnahthlak India ram hmun hrang hranga mite leh ram danga mite chungah thinlung takin lawmthu kan sawi," an ti.