Tangkhangte rawn lut thei lo

Silchar Mizoram House-a tangkhang mek Mizo truck leh tanker enkawltute chuan November 4, Nilaini zan khan Hailakandi-Bairabi lam aṭangin Mizoramah rawn luh an tum a, mahse, an rawn lut thei lo.

Thu dawn danin, hnam dang, Mizorama bungrua dah turte chu Hailakandi lam aṭangin Mizoramah luh an tum avangin Mizo ho pawhin luh ve nghal an tum a ni. Mahse, Mizoram House an chhuahsan thui hmain hnam dang driver-te lêt leh lam nen an intâwk a, Assam police-in an lo dan thu an sawi avangin an lêt ve leh nghal a ni.

Tun dinhmunah Silchar Mizoram House-ah Mizo enkawl tanker 11, truck (gas phur) paruk, Pik-up truck pahnih leh, Guwahati aṭanga rawn haw tum mimal lirtheia kal chhungkaw pakhat an táng mek a ni.