Dr Vanlalthlana'n MLA chawimawina a dawng

Zo Peoples' Movement (ZPM) Legislature Party secretary Dr Vanlalthlana chuan Vigyan Bhavan, New Delhi-a February 20-23, 2020 chhunga neih 10th Bharatiya Chhatra Sansad (Indian Student Parliament)-ah 'Ideal Youth MLA Honor' a dawng a; Jharkhand Legislative Assembly speaker Rabindra Nath Mahato-a'n a hlân.

Chawimawina hi Bha­ratiya Chhatra Sansad Foundation, Maharashtra Institute of Technology (MIT) leh MIT World Peace University-te'n Inter Parliamentary Union, Common Wealth Parlia­mentary Association, UNESCO Peace Chair, sorkar laipuia Youth Ministry leh Maharashtra sorkarte bultuma an buatsaih a ni.

10th Bharatiya Chhatra Sansad hi India vice pre­sident M Venkaiah Naidu-in a hawng a, India politics leh kawng hrang hranga mi challang tak takte an tel a; a khàrna inkhawm chu sorkar laipuia minister of state Kiren Rijiju, President hlui Pranab Mukherjee leh minister hlui Natwar Singh-te pawhin an hmanpui.

Dr Vanlalthlana bakah hian, Karnataka state-a MLA Sowmya Reddy leh Andhra Pradesh-a MLA Yeluri Sambasiva Rao te hnenah chawimawina hlan a ni bawk.

Chawimawina a dawn zawha thu a sawiah Dr Van­lalthlana chuan, chawi­mawina dawng tura thlangtute leh inkhawmpui buatsaihtute chungah lawmthu a sawi a, 'Chhandamtu Isua Krista avanga he lawmman dawng thei ka ni a, Pathian chungah lawmthu ka sawi a ni," a ti a; ram rawngbawl hna a thawh theihna tura an chhungkua leh Aizawl North-II bial mipuite duhsakna nasa tak a dawn avangin a lawm thu a sawi.

ZPM chuan thuchhuah siamin, Dr Vanlalthlana'n India rama MLA ṭha chawi­mawina a dawng chu an lawmpui thu leh an chhuan thu an tarlang.