Liverpool champion nan match li a tawk

Thawhṭanni zan Premier League inkhelah Liverpool chuan hlauthawng chungin West Ham chu 3-2 in an hneh a, league nomawi chawi turin match li chak bak an mamawh ta lo. 

Reds hian match 27 an khelh tawhah tlawm an la nei lo a, a chung berah point 70 an nei - anmahni hnaih bertu City nen khelh zat inangah point 22-in an sang fal tawh a, match 11 chiah khelh tur a awm ta. 

Anfield-a inkhelah Reds hian awlsam takin hnehna erawh an chang lo. Georginio Wijnaldum goal hmahruai chu Issa Diop leh substitute Pablo Fornals ten Hammers tan an chhang let. 

Mahse, champion zia kan sawi ṭhin kha a lang chhuak leh a, Mohamed Salah leh Sadio Mane ten Reds tan rawn khung ve lehin 3-2 in a tawpah hnehna an chang. 

Tla thei dinhmunah West Ham an ding a, Liverpool erawh khelh tur la awm nual mah se an hma hruai falna avangin Premier League champion tur an ni tih a hriat tawh. 

Team pahnih an inthlau a, Anfield-a inkhel a nih bawk avangin Reds chu awlsam taka chak tura ngaih an ni - minute kuana lekah Wijnaldum chuan goal a rawn tauh lut nghal a, West Ham keeper Lukasz Fabianski tlaw vangah a ngaih theih. 

Liverpool-in goal an khung hma a, goal eng zat tak khung ang maw? tih chu zawhna a ni. Mahse, minute thum hnu lawkah Hammers-in an rawn chhang let a, khawvela goalkeeper ṭha pawl Alisson chuan a tih tur ti tawk loin Issa Diop-a ball tauh a chhuah. 

Second half-ah Liverpool ṭha zawk hmuh beisei a ni a, goal khung hmasatu erawh Hammers an ni - bench aṭanga luhtir Fornals chuan goal a rawn khung a, 2-1 a ni. Liverpool record a derthawng. 

Anfield-ah 2-1 in Reds an hnufual a, mahse Jurgen Klopp-a naute danglamna a lang. Khelh ṭhat loh zanah pawh an beidawng ve lo a, chak tura inrinna rilru huaisen an pu. 

Minute 68-naah Salah a lo lang a, Egyptian forward hian Fabianski kap karah pet lutin si phurh a rawn sut. Liverpool an phur tulh tulh a, team ṭha lo zawk nemna a langsar tawlh tawlh.

Salah goal khung zanah Mane-a'n 'nil' bik a duh lo a, minute 81-naah chakna goal a rawn khung - Senegalese forward hian an goal lina a khung zuiah inngai mah se VAR hmanga ennawn a nih hnuah hei erawh pawm a ni lo. 

Hun tawp thlengin goal dang a lut tawh lo a, Liverpool an chak - league match 18 chu a zawnin an chak ta a, English top flight football-a chak zawn rei ber record Manchester City (August - December 2017) in an lo siam tawh chu an nihrual. 

•    West Ham manager David Moyes-a'n Liverpool hi inelna hrang hrangah vawi 16 a hmachhawn tawh a, vawi kua tlawmin vawi sarih a draw - Man Utd, Sunderland leh West Ham hmangin a hneh zo lo vek.

•    Reds hian Premier League-a an home match hnuhnung 21-ah hnehna an chang a, Bill Shankly hoa January-December 1972-a English top flight record an lo siam tawh chu an nihrual. 

•    Cesc Fabregas ( kum 20 leh ni 134) leh Wayne Rooney (kum 21 leh ni 63)-te chu Trent Alexander-Arnold (kum 21 leh ni 140) aia 25 Premier League assist 25 nei tling hma an ni. 

•    August 2014-a Premier League match a khelh ṭan hnuah Andrew Robertson chuan league-ah assist 27 a nei tawh a, hetih chhung hian ani aia PL assist ngah zawk an awm lo.

Bul kan ṭan danah ka lawm a, goal hmahruai ṭha tak kan khung a ni. Mahse, second ball-ah kan ṭha tawk lo a, kan hna kan tlin lo. Kha vang khan kan talbuai a, West Ham kha inrintawkna kan pe a ni. 

Man City record nihrual emaw khum hi ka ngaihtuah ngai lo a, mahse kan ti miau si. Dik taka sawi chuan he record kan nihrual hi mak ka ti a, a ṭha zawnga thleng apiangin min pui kha kan vannei hle. Si phurh kan sut a, fan-ten thawm ring tak an neih nghal avangin min pui hle. 

Tun season-ah hian eng pawh thleng se, kan vai hnathawh rah a ni a, thlawpna kan dawn zawng zawngah ka lawm takzet. 

- Jurgen Klopp, Liverpool manager

Zanin kan inkhelh hma khan Anfield-a beiseina nei ngam turin tuman min ngai lo ang. Mahse, kan khel ṭha a, chance pawh kan ngah hle. Team kan nihna angin kan khel ṭha a, mimal tihsual kan tuar a ni. Point mamawh hle mah ila kut ruaka kan haw a ngai si. 

- David Moyes, West Ham manager

February 29, Inrinni    Watford

March 07, Inrinni    Bournemouth

March 16, Thawhṭanni    Everton

March 21, Inrinni    Crystal Palace

*    Liverpool hi an hmabak match liah an chak vek chuan an champion dawn a, an hnuai chiaha awm City-in hetih chhunga chak loh an neih chuan Palace aia hmaah an champion thei bawk.