Dubai -ah Djokovic a chungnung ber

Novak Djokovic chuan rawlthar duhawm Stefanos Tsitsipas hnehin Dubai Tennis Cham­pionships-ah a champion. Serbian tlangval hi world ranking chhuak tharah pawh a chung ber luahtu a nih chhunzawm ang.

Inrinni zan final-ah Djokovic hian seeded pahnihna Tsitsipas hi 6-3, 6-4 a hnehin 2013 hnua a vawi khat nan Dubai-ah hian hlawhtlinna a chang leh chiah; final bikah hian double faults a nei miah lo.

Season duhawm hmangtu Djokovic-a'n kuminah match 21 khel tawhin hnehna a la chang vek, tennis a khelh hun chhunga a nomawi 79-na chawi turin buaina a nei lo, phu tak chungin hnehna a chang.

Kum 32 mi Djokovic chuan, "Match tir lamah ka service ka hum hram hram zel kha ka ṭhatpui, match ka khelh hoah buai em em nei loa hlawhtlinna ka chang thei kha a lawm­awm," a ti. Kum 2009, 2010, 2011 leh 2013 pawh khan Dubai-ah hian a lo champion tawh.

Serbian tlangval hian January thla khan Australian Open nomawi a chawi, Grand Slam title 17 a lak hnua inelna a hmachhawn lehna hmasa berah hian match nga khelin, semifinal-a set khat a hloh bak chu straight set vekin hnehna a chang. World number 1 Djo­kovic chuan, "Chona hmachhawn zel ka duh, phur taka khelh reng a harsa a, thil holam leh te takte anga kan ngaih aṭang pawhin mahni intih phur thiam a pawimawh, inelnaah hian a lian leh a te deuh pawh nomawi chawi tur chuan a awlsam lo vek," a ti.