ISL: FC Goa ngamtu Chennaiyin dinhmun a ṭha

Inrinni zan khan Indian Super League semifinal first leg khelh a ni a, rin hlawh lo zawk Chennaiyin FC chuan league round-a point hmu hnem ber FC Goa chu 4-1 ngawtin an lo sawp!

Chennai club tan Lallianzuala Chhangte chuan goal hnuhnung ber a khung a, assist vawi khat neitu Jerry Lalrinzuala chu Emerging Player of the Match-ah thlan a ni a, Laldinliana Renthlei chuan inkhel bul a ṭan bawk. 

March 7 zanah semifinal second leg khelh a ni dawn a, FC Goa khelmuala la lenglut tur an nih avangin Chennaiyin tan hahdam taka awm a la rem lo. 

FC Goa coach Clifford Miranda chuan, "Engkim thlak danglam theitu team an awm a nih chuan keimahni hi kan ni," tiin an la tlawm loh thu a sawi a, Chennaiyin tan final a la chiang lo.

FC Goa-in player pawimawh Hugo Boumous chu dam lohna avangin an hruai tel thei lo a, kum 24 mi attacking midfielder hi match 14-a goal 11 khunga assist vawi 10 nei thei a nih avangin a tel lo hi FC Goa-in an tuar dawn tih a hriat sa. 

Boumous awm loh avangin Miranda-a'n tun season-a match 18-a goal hnih lek khungtu Manvir Singh a rin a ngai a, 4-2-3-1 formation-ah kum 24 mi striker hi tlarhmaah maltlat tir a ni. Goal 14 khunga assist vawi li nei tawh Ferran Corominas chu pawh hnun hret a ni a, Spanish striker hi Manvir Singh thlawp turin Boumous-a position-ah a awm.

Goan club hian Brandon Fernandes an chhawr thei lo bawk a, a aiah Seminlen Doungel chu luhtir a ni - FC Goa-in an rinrawl pahnih tel loin semifinal first leg an hmachhawn. 

South Indian club tan 'Mizo trio' Lallianzuala Chhangte, Jerry Lalrinzuala leh Laldinliana ten inkhel bul an ṭan vek a, Chennaiyin hian an ṭhat dan berin FC Goa an hmachhawn thei. 

First half-ah goal lut lo mah se player kim zawka khel danglamna second half-ah a lang ṭan - Lucian Goian, Anirudh Thapa, Eli Sabia leh Lianzuala ten minute 25 chhungin goal li an rawn khung. Tlarhmaah Lianzuala a hmuhnawm a, a hnung lamah Jerry leh Dinliana an ṭangkai hle - Anirudh goal khung hi Jerry Lalrinzuala siamsak a ni. 

Chennai club-in inkhel an thunun a, FC Goa an hawihai - hun tawp nan minute nga chiah a awm tawh tihah Chennaiyin defender inringthul karah Saviour Gama chuan goal khat a rawn thawh ve a, away goal hlu a ni. 

Match hmasa palia goal khung lo team khan pen khatin final an hnaih ta sawt a, Chennaiyin boss Owen Coyle hming lam hmaih a harsa hle. 

Kum 53 mi coach chuan, "Goal chhuah kha kan duh lo. Mahse, inkhelh hma khan 4-1 a chak kan duh leh duh loh min zawt se, lawm takin chu result chu ka pawm ang. India rama team ṭha ber kan hmachhawn a ni," a ti a, result-ah a lawm. 

Mahse, Bolton Wanderers boss hlui hi a ṭawng uang duh lo. Irish manager chuan, "Thlamuang taka awm hun a la ni lo. Kan chawlh hahdam hma lutuk chuan min hrem mai ang," a ti a, hna an la neih thu a sawi. 

FC Goa coach Miranda pawh la beidawng duh loin, "Gama goal khan beiseina min pe. Hna a hautak dawn tih chu ka hria a, mahse ka player-te ka ringtawk a ni," a ti a, an mualah Chennaiyin lehthal a tum.