Ruahin Mizoram a chelh

Mizoramin Ranji Trophy-ah a vawi hnih nan chak an inbeisei a, Nagaland nen chak turin dinhmun ṭha takah ding mah se ruahin a chelh tak avangin an inhnehtawk. Amaherawhchu Mizoram hi first innings-ah an chet ṭhat zawk avangin point thum an hlawh chhuak a, Nagaland-in point khat an hmu thung.

Mizoram hi February 4-7, 2020 chhung hian Chandigarh nen an inkhel leh dawn a, February 12-15, 2020 hian Goa nen an inkhel leh ang.

Kolkata-a inkhelah Nagaland-in bat hmasak an thlang a, first innings-ah run 243/10 an siam. Mizoram bowler G. Lalbiakvela'n wicket nga lain run 55 a pe a, Nagaland-in an ngam lo. Luangmual tlangval G. Lalbiakvela hi man of the match-a thlan a ni a, Mizo zinga Ranji Trophy-a man of the match ni thei hmasa ber a ni.

Mizoram bat hun a thleng a, Lalhruaizela'n run 40 a siam bakah Taruwar Kohli (127) leh KB Pawan (129*) an che ṭha a, run 318 an siam tihin mi pathum chiah an la thi. Ruahsur vangin inkhel an chhunzawm thei lo a, team pahnih an inhnehtawk. 

Mizoram hian match sarih an khelhah point 12 an hmu a, pariatnaah awmin an hnuaiah Sikkim leh Arunachal Pradesh an awm. Season liam ta khan Mizoram hian chak nei loin table mawngphahah an awm a, kuminah hmasawnna a awm.

Cricket Association of Mizoram (CAM) tirhin Lalthansanga, Vanglaini sports writer bakah Jonathan Lalrinchhana, Mike L. Rokhum leh Lalringzela ten Mizoram inkhel hi an en a, Ranji Trophy kalphung an zirchiang nghal bawk.

Nagaland vs Mizoram

Ruahsur vangin an inhnehtawk.

Wicket nga latu G. Lalbiakvela chu man of the match-a thlan a ni.

1st Innings

Nagaland : 243/10 (83 overs)

Sedezhelie 105* (253)

Zhimomi 31 (41)

G Lalbiakvela 55/5 (21)

Lalhruaimawia Ralte 48/2 (16)

Mizoram: 318/3 (94 overs)

KB Pawan 129* (225)

Taruwar Kohli 127 (223)