Tualchhung nula Barty zinkawng a tawp

World number 1, seeded pakhatna leh tualchhung nula ni bawk Ashleigh Barty chu Australian Open semifinal-ah vuak tlak a ni. Nimin inkhel hmuhnawm takah Sofia Kenin chuan straight set-in Barty hi a hneh.

Rod Laver Arena, Melbourne Park-a inkhelah darkar khat leh minute 45 chhungin Barty hi 7-6 (8-6), 7-5 in a chak lo; Australian nula zingah kum 40 hnuah an rama khelh Grand Slam bika final lut thei nih a tumna chu a thamral.

Barty hi a vanduai, set pahnih an khelhah hian set point a hmu ve ve - mahse a chhawr ṭangkai thei lo. American nula Kenin a vannei a, a huaisen bawk; a vawi khat nana Grand Slam final a khel tur a lawm zia lantir nan court-ah a racquet dah thlain lawm avanga mittui luang thup nan kut khing hnihin a inhup.

Nipui lai a nih bakah ram kang vangin Australia a lum zual a, nimina hmeichhe singles khelh lai hian 40C a tling hial. Tawnhriat ngah leh khaw lum tuar fo tawh Barty hi dinhmun ṭha zawk tura ngaih a ni.

Tualchhung nula hian bul a ṭan fuh a, a service bikah phei chuan point hmuh theih hmasa 24 zinga 20 ngawt a hmu thei. Mahse, set khatna 5-5 a nih laiin Kenin-i'n a rawn chhaih buai ṭan, inkhelh chhungin a service vawi hnih hloh zuiin a chesual ngun zawkah a ṭang.

French Open champion Barty hian match point hmasa chu 17-shot rally an neih hnuah winners ṭha tak hmangin a inchhanhim, a hnuhnung zawkah erawh na taka a ball vuak let chu line pawnah a kal hlauh.

Kum 1980 daih tawh khan Wendy Turnbull chuan Australian Open final hi a khel, a hnu lamah Melbourne Park-ah hian tualchhung nula final thleng thei an awm tawh rih lo. Kuminah beiseina nei sang viau mah se an thil duh hmu tur chuan season thar an nghah leh rih a ngai dawn.

Seeded 14-na Sofia Kenin hi player ṭha tak ni mah se tun hmain Grand Slam a la thleng ngai lo, kum 21 mi chauh a la nih avangin hmabak erawh tam tak a la nei tih a chiang. A tan chuan final thlen ringawt pawh hi thil lawmawm tak a ni phak tawh.

Russia rama piang, a naupan laia US lama pem ta Kenin chuan, "Sawi tur ka hre lo, awih mai pawh a harsa. Kum nga mi chauh ka nih lai khan Grand Slam final khelh hi chu ka lo suangtuah tawh, hetiang thleng tur hian ka thawkrim hle," tiin a sawi.

Williams unau Serena leh Venus te chhiar tel lohin US nula zingah Kenin hi Lindsay Davenport (2005) hnu lama Australian Open final thleng leh hmasa ber a ni. A naupan lai aṭangin Kenin hi fing danglam tak a ni a, TV-ah pawh a naupan lai aṭangin a ṭang fo tawh; tunah chuan a duhthusam ṭhin chu a tak ram a thleng mek.

Player ṭha leh tawnhriat ngah zawk Barty lakah Kenin a zam duh lo a, season hmasa lama WTA Tour titles pathum la thei a nihna a lantir thei zel a, world ranking chhuak tharah a sang 10 zingah a tel pha dawn.